Mohammed Shami | भाजप आमदार-मोहम्मद शमी यांच्यात भेट, फोटो सोशल मीडियावर व्हायरल
Mohammed Shami | टीम इंडियाचा वेगवान गोलंदाज मोहम्मद शमी याने नुकत्याच पार पडलेल्या 13 व्या वर्ल्ड कप स्पर्धेत धारदार बॉलिंगच्या जोरावर सर्वाधिक 24 विकेट्स घेण्याची कामगिरी केली. शमीच्या या कामगिरीचं सोशल मीडियावर अद्याप कौतुक करण्यात येत आहे.
टीम इंडियाचा स्टार बॉलर मोहम्मद शमी याने वर्ल्ड कप 2023 मध्ये सर्वाधिक विकेट्स घेत धमाका केला. वर्ल्ड कपनंतर टीममधील मुख्य आणि अनुभवी खेळाडूंना विश्रांती देण्यात आली आहे. या दरम्यान भाजप आमदाराने मोहम्मद शमीची भेट घेतली आहे. भाजप आमदाराने सोशल मीडियावर शमीसोबतचे फोटो शेअर केले आहेत.
उत्तर प्रदेश भाजप आमदार आकाश सक्सेना यांनी मोहम्मद शमीची भेट घेतली. शमीने आमदार सक्सेना यांना घरी येण्याचं आमंत्रण दिलं होतं. त्यानुसार सक्सेना आणि शमी यांच्यात अलीनगर येथे भेट झाली.
या भेटीदरम्यान आमदार सक्सेना आणि मोहम्मद शमी यांच्यात विविध विषयांवर चर्चा झाली. आमदार सक्सेना यांनी शमीच्या वर्ल्ड कपमधील कामगिरीचं कौतुक केलं.
मोहम्मद शमी आणि आमदार सक्सेना दोघे क्रिकेटही खेळले. सक्सेना यांनी मोहम्मद शमीला बॉलिंग टाकली.
दरम्यान सक्सेना-शमी भेटीमुळे भारतीय क्रिकेटर राजकारणात प्रवेश करणार का अशी चर्चा सोशल मीडियावर रंगली आहे. दोघांच्या फोटोमुळे या चर्चा सुरु झाल्या आहेत.
