गुजरातच्या रिया सिंघाने पटकावला ‘मिस युनिव्हर्स इंडिया’चा किताब; उर्वशीने घातला मुकूट
विजेतेपद पटकावणारी रिया सिंघा ही गुजरातची असून ती उत्तम मॉडेलसुद्धा आहे. सोशल मीडियावर तिचा मोठा चाहतावर्ग आहे. इन्स्टाग्रामवर तिचे 40 हजारांहून अधिक फॉलोअर्स आहेत.
गुजरातच्या रिया सिंघाने 'मिस युनिव्हर्स इंडिया 2024'चा किताब पटकावला आहे. रियाने इतर 51 स्पर्धकांना मागे टाकत अत्यंत प्रतिष्ठित सौंदर्यस्पर्धेचं विजेतेपद पटकावलंय.
या विजयानंतर आता ती 'इंटरनॅशनल मिस युनिव्हर्स 2024' या स्पर्धेत भारताचं प्रतिनिधित्व करणार आहे. रविवारी राजस्थानमधील जयपूर याठिकाणी ग्रँड फिनाले पार पडला होता.
या विजयाबद्दल रिया म्हणाली, "इथपर्यंत पोहोचण्यासाठी खूप मेहनत घेतली आहे. या मुकूटाच्या लायक बनण्यासाठी मी बरेच प्रयत्न केले आहेत. याआधीच्या विजेत्यांकडून मला खूप प्रेरणा मिळाली."
या स्पर्धेत प्रांजल प्रिया दुसऱ्या क्रमांकावर होती, तर छवी वर्ग तिसऱ्या स्थानी होती. यावेळी अभिनेत्री उर्वशी रौतेलाने तिच्या हस्ते रियाला 'मिस युनिव्हर्स इंडिया'चा मुकूट घातला.
"यावर्षी भारत नक्कीच 'मिस युनिव्हर्स'चा मुकूट जिंकेल", असा विश्वास तिने यावेळी व्यक्त केला. उर्वशी या स्पर्धेतल्या परीक्षकांपैकी एक होती.
