Alcohol Facts : दारूसोबत गोड पदार्थांऐवजी नमकीनच का खातात? हे आहे कारण
दारूसोबत चिप्स, शेंगदाणे आणि चिवडा खाण्याची सवय अनेकांना असते. पण दारूसोबत खारट पदार्थच खाण्याची इच्छा का होते? यामागे काय कारण असते? जाणून घ्या...
दारूसोबत चिप्स, शेंगदाणे, चिवडा आणि इतर खारट पदार्थ खाण्याची सवय अनेकांना असते. यामागे केवळ परंपरा किंवा आवड नसून, दारू प्यायल्यानंतर चविष्ट आणि खारट पदार्थ खाण्याची इच्छा वाढण्याचाही संबंध असू शकतो.
दारू प्यायल्यानंतर यकृतातून FGF21 नावाच्या हार्मोनच्या निर्मितीला चालना मिळू शकते. हा हार्मोन शरीरातील प्रथिनांच्या गरजेशी संबंधित भूक नियंत्रित करण्यात भूमिका बजावतो. त्यामुळे काही लोकांना गोड पदार्थांपेक्षा खारट आणि चवदार पदार्थ खाण्याची इच्छा अधिक होऊ शकते.
दारूसोबत गोड पदार्थ खाण्यास मनाई नाही. मात्र, काही संशोधनांनुसार दारूचे सेवन केल्यानंतर खारट आणि चवदार पदार्थ खाण्याचे प्रमाण वाढू शकते, तर गोड पदार्थांचे सेवन कमी होऊ शकते. त्यामुळे दारूसोबत नमकीन खाण्याची सवय अधिक दिसून येते.
खारट पदार्थ खाल्ल्याने दारूची नशा कमी होते, याला ठोस वैज्ञानिक आधार नाही. दारूमुळे शरीरातील पाण्याचे संतुलन बिघडू शकते. शिवाय, जास्त मीठ असलेल्या पदार्थांमुळे तहान वाढू शकते. त्यामुळे खारट पदार्थ खाल्ल्याने नशा उतरेल किंवा दारूचा परिणाम टळेल, असे समजणे चुकीचे आहे.
दारूसोबत चिप्स, तळलेले पदार्थ आणि कमी प्रथिने असलेले प्रक्रिया केलेले स्नॅक्स जास्त खाल्ल्यास अतिरिक्त कॅलरी शरीरात जाऊ शकतात. त्याऐवजी डाळी, कडधान्ये किंवा इतर प्रथिनेयुक्त पदार्थ खाणे तुलनेने चांगला पर्याय ठरू शकतो. मात्र, कोणताही पदार्थ खाल्ल्याने दारूचे आरोग्यावरील दुष्परिणाम पूर्णपणे टाळता येत नाहीत.
(टीप- मद्यपान आरोग्यास हानिकारक असते. मद्यपान केल्यामुळे यकृत खराब होते. ही स्टोरी प्राथमिक माहितीवर आधारलेली आहे. मद्यापानास प्रोत्साहन देण्याचा आमचा हेतू नाही.)
