वाय-फाय राउटरलाही असते एक्सपायरी डेट; कधी, किती वर्षांनी बदलावा?
तुमचे वाय-फाय राउटर ४-५ वर्षांपेक्षा जुने आहे का? संथ इंटरनेट आणि हॅकिंगचा धोका टाळण्यासाठी जुने राउटर बदलणे का महत्त्वाचे आहे, हे सविस्तर जाणून घ्या
आपल्यापैकी अनेकजण एकदा वाय-फाय राउटर लावले की ते वर्षानुवर्षे बदलत नाहीत. मात्र, इलेक्ट्रॉनिक उपकरणांप्रमाणेच राउटरलाही एक एक्सपायरी डेट असते. ऐकून धक्का बसला ना, पण हे खरं आहे.
तज्ज्ञांच्या मते, जुन्या राउटरमुळे केवळ इंटरनेटचा वेग मंदावत नाही, तर तुमच्या गोपनीयतेलाही मोठा धोका निर्माण होऊ शकतो. 'कंझ्युमर रिपोर्ट्स' सारख्या संस्थांच्या अहवालानुसार, उत्तम सुरक्षा आणि हाय-स्पीड इंटरनेटसाठी ३ ते ५ वर्षांनंतर राउटर अपग्रेड करणे गरजेचे आहे.
जुने राउटर्स हे जुन्या तंत्रज्ञानावर आधारित असतात. त्यामुळे तुम्ही १०० Mbps चा प्लॅन घेतला असला, तरी प्रत्यक्षात तुम्हाला ३०-४० Mbps पेक्षा जास्त वेग मिळत नाही. नवीन वाय-फाय राउटर अधिक वेगवान कनेक्टिव्हिटी देतात.
जुन्या मॉडेल्ससाठी कंपन्या सॉफ्टवेअर अपडेट्स देणे बंद करतात. यामुळे हॅकर्सना तुमची वैयक्तिक माहिती, पासवर्ड किंवा बँकिंग डिटेल्स चोरणे सोपे जाते. नवीन राउटर्समध्ये WPA3 सारखी प्रगत सुरक्षा प्रणाली असते.
सततच्या उष्णतेमुळे राउटरचे अंतर्गत अँटेना आणि सुटे भाग कमकुवत होतात, ज्यामुळे सिग्नलची रेंज कमी होते. आजकाल घरात स्मार्ट टीव्ही, लॅपटॉप, अलेक्सा आणि स्मार्ट बल्ब अशी अनेक उपकरणे असतात.
जुने राउटर्स एकाच वेळी इतकी उपकरणे हाताळू शकत नाहीत. याउलट, नवीन राउटर्समधील 'MU-MIMO' तंत्रज्ञान एकाच वेळी अनेक उपकरणांना विनाअडथळा इंटरनेट पुरवते. त्यामुळे, जर तुमचे राउटर ५ वर्षांपेक्षा जुने असेल, तर चांगल्या स्पीड आणि सुरक्षेसाठी ते बदलणं सोयीचे ठरते.
