GK : जगातले असे अजब देश जिथे रविवारी नसते सुट्टी, सगळी कार्यालये असतात चालू!
या जगात असे काही अजब देश आहेत, जिथे रविवारी चक्क सुट्टी नसते. त्या देशांत सगळी कार्यालये रविवारी चालूच असतात. त्यांच्या साप्ताहिक सुट्टीचा दिवस वेगळाच असतो.
जगातल्या बहुसंख्या देशांत रविवारला सुट्टी असते. म्हणजे रविवारी बऱ्याच देशांत शासकीय कार्यालये, खासगी कार्यालये बंद असतात. परंतु रविवारी सुट्टी असणे हा काही जागतिक नियम नाही. या जगात असेही काही देश आहेत, जिथे रविवारी सुट्टी नसते.
रविवारी सुट्टी देण्याची प्रथा ही ख्रिश्चन परंपरेशी निगडीत आहे. ख्रिश्चन धर्मातील परंपरेत रविवारला पूजेचा दिवस मानले जाते. याउलट अनेक मुस्लीम देशांत जुम्मा म्हणजेच शुक्रवारी साप्ताहिक सुट्टी असते.
मुस्लीम धर्मात शुक्रवारच्या प्रार्थनेला विशेष महत्त्व आहे. म्हणूनच अनेक मुस्लीम देशांत शुक्रवारी साप्ताहिक सुट्टी असते. तर ज्यू धर्मीय लोकांसाठी शनीवार फार महत्त्वाचा आहे. त्यामुळे काही देशांत शनिवारी सप्ताहिक सुट्टी असते.
इराण या मुस्लीम राष्ट्रात शुक्रवार अधिकृतरित्या साप्ताहिक सुट्टीचा दिवस आहे. या देशात लोक गुरुवारपर्यंत काम करतात. त्यानंतर शुक्रवारी साप्ताहिक सुट्टी असल्याने आराम करतात. अफगाणिस्तानमध्येही अशाच साप्ताहिक सुट्टीचे पालन केले जाते.
सौदी अरेबिया, कतार, ओमान, कुवैत, इराक, जॉर्डन, लिबिया, बांगलादेश, इजिप्त, मालदीव अशा देशात शुक्रवार आणि शनिवार हा विक एंड असतो. रविवारी तिथे सर्व कार्यालये खुली असतात. नेपाळ देशात सगळीकडे शनिवारी साप्ताहिक सुट्टी असते. रविवारी तेथे सर्व शासकीय कार्यालये खुली असतात.
