Manoj Jarange Patil: मनोज जरांगेंच्या सहकाऱ्यांच्या अडचणीत वाढ, थेट आर्थिक व्यवहारांबाबत… मोठी अपडेट समोर

कृष्णा सोनारवाडकर, प्रतिनिधी: मराठा आंदोलक मनोज जरांगे पाटील हे डिफेंडर गाडीतून प्रवास करत असल्यामुळे वाद निर्माण झाला. त्यानंतर ती गाडी मनोज जरांगे यांच्या मित्राची असल्याची समोर आली आणि त्यांनी ती गाडी मित्राला परत केली. आता मनोज जरांगे यांच्याशी संबंधित काही व्यक्तींच्या आर्थिक व्यवहारांबाबत ईडी उच्चस्तरीय गोपनीय चौकशी सुरू केली आहे. आर्थिक अनियमिततेच्या अनेक तक्रारी प्राप्त झाल्यानंतर ईडीने संबंधित तक्रारदारांचे जबाब नोंदवून पुरावे आणि कागदपत्रे मागवली आहेत. तसेच आयकर विभागासह अन्य सरकारी यंत्रणांकडूनही संबंधित तक्रारी आणि आर्थिक नोंदींची माहिती मागविण्यात आली आहे.

बीडमधील कार्यकर्ते अमोल सुखदेव खुणे यांनी दिलेल्या तक्रारीत मनोज जरांगे तसेच अन्य चार व्यक्तींच्या आर्थिक व्यवहारांची चौकशी करण्याची मागणी करण्यात आली आहे. या तक्रारीत बेहिशेबी मालमत्ता, संशयित बेनामी मालमत्ता, सरकारी कंत्राटे आणि विविध आर्थिक व्यवहारांवर प्रकाश टाकण्यात आला आहे. तसेच मराठा आरक्षण आंदोलनावरील खर्च, जमीन खरेदी-विक्री, वाळू व्यवसाय आणि विविध सरकारी विभागांकडून मिळालेल्या कंत्राटांचाही उल्लेख करण्यात आला आहे.

तक्रारदाराने संबंधित आर्थिक व्यवहारांची रक्कम सुमारे १०० ते २०० कोटी रुपये किंवा त्याहून अधिक असल्याचा दावा केला आहे. मात्र हा आकडा अद्याप स्वतंत्रपणे सिद्ध झालेला नाही. सध्या ईडीची चौकशी टी-१ गुप्तचर स्तरावर सुरू असून अद्याप ईसीआयआर दाखल करण्यात आलेले नाही किंवा मनी लाँड्रिंगचा औपचारिक गुन्हाही नोंदवण्यात आलेला नाही.

या चौकशीमुळे मराठा आरक्षण आंदोलनाशी संबंधित आर्थिक व्यवहारांवर चर्चा सुरू झाली आहे. ईडीने गोपनीय पद्धतीने चौकशी सुरू ठेवल्याने अधिकृत माहिती मर्यादित आहे. मात्र तक्रारींमधील आरोप गंभीर असल्याने या प्रकरणाकडे सर्वांचे लक्ष लागले आहे. पुढील तपासात अधिक पुरावे समोर आल्यास या प्रकरणाची अधिकृत नोंद होऊ शकते, असे सूत्रांचे म्हणणे आहे.