‘सरकार पाण्यात बसलेल्या म्हशीसारखं, ढुसणी दिल्याशिवाय हलत नाही’, मराठा आरक्षणावरुन विनायक मेटेंचं टीकास्त्र

शिवसंग्रामचे नेते विनायक मेटे यांनी पुन्हा एकदा महाविकास आघाडी सरकारवर जोरदार हल्ला चढवलाय.

शिवसंग्रामचे नेते विनायक मेटे आणि मुख्यमंत्री उद्धव ठाकरे

sagar joshi | Updated on: May 19, 2021 | 3:16 PM

मुंबई : मराठा आरक्षण सर्वोच्च न्यायालयाने रद्द केल्यानंतर राज्यातील तापलेलं राजकारण थांबायला तयार नाही. विरोधी पक्ष भाजप आणि विविध मराठा संघटनांकडून आता बैठका घेतल्या जात आहेत. तसंच मराठा आंदोलनाची आगामी दिशा ठरवली जात आहे. अशावेळी शिवसंग्रामचे नेते विनायक मेटे यांनी पुन्हा एकदा महाविकास आघाडी सरकारवर जोरदार हल्ला चढवलाय. हे सरकार पाण्यात बसलेल्या म्हशीसारखं आहे. ढुसणी दिल्याशिवाय हलणार नाही, असा टोला मेटे यांनी ठाकरे सरकारला लगावलाय. (Vinayak Mete criticizes Thackeray government on Maratha reservation issue)

महाविकास आघाडी सरकार खोटारडे आहे. जेव्हा आम्ही सांगत होतो की SEBCच्या विद्यार्थ्यांना नियुक्त्या द्या. तेव्हा विद्यार्थ्यांना कोर्टात जा म्हणाले आणि आता मराठा आरक्षण रद्द झाल्यानंतर सरकारला जाग आली आहे. याला मुख्यमंत्री उद्धव ठाकरे आणि मराठा आरक्षण विषय उपसमितीचे अध्यक्ष अशोक चव्हाण जबाबदार आहेत. त्यांच्यामुळेच मराठा समाजाला आरक्षण मिळाले नाही. आजपर्यंत या सरकारने EWSचंही आरक्षण लागू केलं नाही. ‘सारथी’चे विद्यार्थी पीएचडी करत आहेत. त्यांना एक दमडीही फेलोशिप मिळाली नाही. 17 तारखेला घरात राहून उपोषण केलं. पण पोलिसांनी त्या सगळ्या विद्यार्थ्यांनी पत्र पाठवलं. त्यांना शिकूही देत नाहीत, न्याय देत नाहीत, हे कसलं सरकार? असा संतप्त सवाल मेटे यांनी विचारलाय.

‘येत्या आठवड्यापासून मराठा समाज रस्त्यावर उतरेन’

येत्या आठवड्यापासून मराठा समाज मुंबईच्या रस्त्यावर उतरेल आणि आंदोलन करेल. 5 जूनला बीडमध्येही आंदोलन होईल. मोठ्या प्रमाणात समाज रस्त्यावर उतरेल. मुंबईतही आंदोलन करणार असल्याचा इशारा मेटे यांनी दिलाय. वणवा पेटणार, सरकारला दाखवुन देऊ की मराठा समाजाची ताकद काय आहे, असंही मेटे म्हणालेत.

ही मोर्चे काढण्याची वेळ नाही – संभाजीराजे

मराठा आरक्षणाच्या मागणीसाठी मोर्चे काढण्यासाठी सध्याची वेळ योग्य नाही. त्यामुळे मराठा समाजातील जाणकार, विद्वान आणि वकिलांशी चर्चा करूनच मी माझी पुढची भूमिका ठरवेन. माझी भूमिका ही सकारात्मक असेल, असे वक्तव्य संभाजीराजे छत्रपती (sambhaji raje) यांनी केले. ते बुधवारी पुण्यात प्रसारमाध्यमांशी बोलत होते. कालच संभाजीराजे यांनी ट्विट करून आपण लवकरच मराठा आरक्षणासंदर्भात (Maratha Reservation) भूमिका स्पष्ट करणार असल्याचे म्हटले होते.

‘मराठा आरक्षणावर तोडगा निघेपर्यंत मी गप्प बसणार नाही’

मराठा आरक्षणाच्या समस्येवर मार्ग निघेल, याविषयी मी सकारात्मक आहे. मार्ग निघेपर्यंत मी गप्प बसणार नाही. माझी यापूर्वीची भूमिकाही समंजस होती. सध्याच्या घडीला कोरोनाची साथ रोखणे गरजेचे आहे. आपण जगलो तर मराठा आरक्षणासाठी लढा देऊ शकतो. आताच्या घडीला उद्रेक झाला तर त्याचा त्रास सामान्य माणसाला होऊ शकतो, असे छत्रपती संभाजीराजे यांनी सांगितले.