साताऱ्यात ऊस दराची बैठक फिस्कटली! शंभूराज देसाईंचा फॉर्म्युला शेतकऱ्यांनी धुडकावला, आता थेट आरपारची लढाई
ऊस दरावर तोडगा काढण्यासाठी साताऱ्यात झालेली बैठक निष्फळ ठरली आहे. पालकमंत्र्यांनी मांडलेला फॉर्म्युला स्वाभिमानी शेतकरी संघटनेने फेटाळला असून 4,200 ते 4,300 रुपये प्रतिटन दर मिळेपर्यंत आंदोलन सुरू ठेवण्याचा इशारा दिला आहे. दुसरीकडे, एवढा दर देणे सध्याच्या परिस्थितीत शक्य नसल्याचे मंत्री शिवेंद्रराजे भोसले यांनी स्पष्ट केले आहे.
संतोष नलावडे, टीव्ही९ मराठी प्रतिनिधी, सातारा: सातारा जिल्ह्यातील ऊस दराचा प्रश्न पुन्हा एकदा चिघळला आहे. जिल्हाधिकारी कार्यालयातील नियोजन भवन येथे पालकमंत्री शंभूराज देसाई यांच्या उपस्थितीत झालेली ऊस दराबाबतची बैठक निष्फळ ठरली. बैठकीत पालकमंत्र्यांनी मांडलेली दराची गणितीय आकडेमोड स्वाभिमानी शेतकरी संघटनेने फेटाळून लावली. उसाला प्रतिटन 4 हजार 200 ते 4 हजार 300 रुपये दर मिळाल्याशिवाय आंदोलन मागे घेणार नाही, असा आक्रमक पवित्रा संघटनेने घेतला आहे. त्यामुळे साताऱ्यातील ऊस दराचा तिढा कायम असून रस्त्यावरील आंदोलनही सुरूच राहणार आहे.
दोन दिवसांत कारखान्यांना दर जाहीर करण्याच्या सूचना
या बैठकीला पालकमंत्री शंभूराज देसाई, मंत्री शिवेंद्रराजे भोसले, खासदार नितीन पाटील, आमदार धैर्यशील कदम आणि स्वाभिमानी शेतकरी संघटनेचे पदाधिकारी उपस्थित होते. यावेळी साखर कारखान्यांनी एफआरपीपेक्षा अधिक किती दर देणार, हे येत्या दोन दिवसांत नोटीस बोर्डवर जाहीर करावे आणि त्याबाबत जिल्हाधिकाऱ्यांना लेखी माहिती द्यावी, अशा सक्त सूचना देण्यात आल्या आहेत.
पालकमंत्री शंभूराज देसाई यांनी बैठकीनंतर ही माहिती दिली. सध्या सणासुदीचे दिवस असल्याने नागरिकांची गैरसोय होऊ नये आणि शेतकऱ्यांच्या मालाचे नुकसान टळावे, यासाठी शेतकरी संघटनांनी आंदोलन स्थगित करावे, असे आवाहनही त्यांनी केले. मात्र, संघटनेने हा प्रस्ताव मान्य केलेला नाही.
साताऱ्यातही कोल्हापूरच्या बरोबरीने दराची मागणी
दुसरीकडे, कोल्हापुरात राजू शेट्टी यांच्यासोबत एफआरपी अधिक 550 ते 600 रुपये दराबाबत चर्चा सुरू असल्याचे संघटनेच्या पदाधिकाऱ्यांनी सांगितले. सातारा जिल्ह्याची उसाची रिकव्हरी कोल्हापूरच्या तुलनेत कमी असली, तरी साताऱ्यातील कारखाने आधी सुरू झाले आहेत. त्यामुळे कोल्हापूरच्या बरोबरीनेच साताऱ्यातील शेतकऱ्यांना उसाचा दर मिळाला पाहिजे, अशी भूमिका संघटनेने मांडली आहे.
स्वाभिमानी शेतकरी संघटनेचे प्रदेश कार्याध्यक्ष अनिल पवार यांनी बैठकीतील चर्चेनंतर आंदोलन सुरूच ठेवण्याचा निर्धार व्यक्त केला. उसाला प्रतिटन 4 हजार 200 ते 4 हजार 300 रुपये दर मिळेपर्यंत माघार घेतली जाणार नाही, असा इशारा त्यांनी दिला. आंदोलनामुळे वाहतुकीवर परिणाम होत असल्याने नागरिकांनी पर्यायी रस्त्यांचा वापर करावा, असे आवाहनही संघटनेने केले आहे.
4 हजार ते 4 हजार 500 रुपये दर देणे शक्य नाही; शिवेंद्रराजे स्पष्टच बोलले
दरम्यान, मंत्री शिवेंद्रराजे भोसले यांनी ऊस दराच्या मागणीवर स्पष्ट भूमिका मांडली. साखर आणि इथेनॉलचे सध्याचे बाजारभाव पाहता उसाला प्रतिटन 4 हजार किंवा 4 हजार 500 रुपये दर देणे सद्यस्थितीत कोणत्याही साखर कारखान्याला शक्य नाही, असे त्यांनी सांगितले.
जिल्हा बँकेकडून मिळणारी 3 हजार 780 रुपयांची उचल आणि त्यातील टॅगिंग याचाही विचार करावा लागेल. केवळ मोठा दर जाहीर करून हा प्रश्न सुटणार नाही, तर कारखान्यांनी हा अतिरिक्त पैसा आणायचा कुठून, हा महत्त्वाचा प्रश्न आहे, असे शिवेंद्रराजे भोसले यांनी स्पष्ट केले. त्यामुळे साताऱ्यातील ऊस दराचा प्रश्न दोन दिवसांत कारखाने काय दर जाहीर करतात, यावर अवलंबून असणार आहे.
