ना नो-बॉल, ना वाईड… चेंडू स्टंपवर आदळला, बेल्स उडाल्या, तरीही फलंदाज नाबाद! नेमकं कारण काय?

क्रिकेटच्या मैदानावर चेंडू स्टंपला लागून बेल्स विखुरल्या जातात आणि तरीही फलंदाज बाद होत नाही, तेव्हा आश्चर्य वाटणे स्वाभाविक आहे. अफगाणिस्तान आणि झिम्बाब्वे यांच्यातील एकदिवसीय तिरंगी मालिकेच्या सामन्यादरम्यान असाच एक प्रसंग घडला. अफगाणिस्तानचा वेगवान गोलंदाज अझमतुल्ला उमरझाईने ब्रायन बेनेटला क्लीन बोल्ड केले, परंतु विकेट देण्याऐवजी पंचांनी तो चेंडू डेड बॉल घोषित केला. तो चेंडू नो-बॉल नव्हता, तरीही उमरझाईची विकेट नाकारण्यात आली.

यामागील कारण म्हणजे गोलंदाजाने खाली टाकलेला टॉवेल. ही घटना झिम्बाब्वेच्या डावातील आठव्या षटकाच्या शेवटच्या चेंडूवर घडली. उमरझाई गोलंदाजी करण्यासाठी धावत येत असताना त्याच्या कमरेला गुंडाळलेला टॉवेल खाली पडला. त्यानंतर त्याने चेंडू फेकला. बेनेटने पुल शॉट मारण्याचा प्रयत्न केला, पण चेंडू त्याच्या बॅटला लागून यष्टींवर आदळला. यष्टी पडताच अफगाणिस्तानच्या खेळाडूंनी जल्लोष सुरू केला.

मात्र पडणाऱ्या टॉवेलमुळे आपले लक्ष विचलित झाल्याचे बेनेटने तात्काळ पंचांकडे तक्रार केली. त्यानंतर पंचांनी चर्चा करून चेंडू डेड घोषित केला. या निर्णयामुळे बेनेट नाबाद राहिला आणि उमरझाईला विकेट देण्यात आली नाही. मेरीलेबोन क्रिकेट क्लबच्या (एमसीसी) नियमांनुसार, जर एखाद्या घटनेमुळे फलंदाजाचे लक्ष विचलित झाले, तर पंच परिस्थितीनुसार चेंडू डेड घोषित करू शकतात. या निर्णयावर प्रश्नचिन्ह निर्माण झाले, कारण टॉवेल खाली पडत असूनही बेनेटने चेंडू खेळण्याचा प्रयत्न केला होता.

यामुळे या परिस्थितीत हा निर्णय योग्य होता की नाही यावर चर्चा सुरू झाली. पंचांच्या निर्णयावर तज्ज्ञ समालोचकांची वेगवेगळी मते होती. एका समालोचकाच्या मते, शॉट खेळण्यापूर्वी बेनेटने बाजूला व्हायला हवे होते. फलंदाजाने आधी शॉट खेळला, तो बोल्ड झाला आणि नंतर टॉवेल पडल्याचा मुद्दा उपस्थित केला, यावर त्याने प्रश्नचिन्ह उपस्थित केले. जीवदान मिळूनही बेनेटला त्याचा फायदा घेता आला नाही. तो ३१ धावांवर बाद झाला, त्यामुळे झिम्बाब्वेचा संघ १३६ धावांवर ऑलआऊट झाला. तत्पूर्वी सेदिकुल्ला अटलच्या १०२ आणि इब्राहिम झद्रानच्या ९० धावांच्या जोरावर अफगाणिस्तानने २९४ धावा केल्या होत्या. रशीद खानने १७ धावांत ४ बळी घेतले. या प्रभावी कामगिरीमुळे अफगाणिस्तानने हा सामना १५८ धावांनी जिंकला.