गोलंदाजाची मेहनत शून्य! जेसन रॉयने फुकटात दिली विकेट, नेमकं काय घडलं पाहा Video
ईटीपीएल 2026 स्पर्धेत ग्लासगो कॉस्मिक आणि डब्लिन गार्डियन्स यांच्यात सामना पार पडला. या सामन्यात एक विचित्र प्रकार पाहायला मिळाला. यात जेसन रॉयनने गोलंदाजाला फुकटात विकेट दिली. कसं काय ते समजून घ्या.
युरोपियन टी20 प्रीमियर लीग अर्थात ईटीपीएल स्पर्धेची जोरदार चर्चा रंगली आहे. कारण दिग्गज खेळाडू या स्पर्धेत खेळत असून क्रीडाप्रेमींचं चांगलंच मनोरंजन होत आहे. या स्पर्धेत ग्लासगो कॉस्मिक आणि डब्लिन गार्डियन्स यांच्यात सामना पार पडला. या सामन्यात एक प्रकार पाहून क्रीडाप्रेमींना हसण्याशिवाय पर्याय उरला नाही. कारण फलंदाज स्वत:च्या चुकीमुळे आणि विचित्र पद्धतीने बाद झाला होता. हा खेळाडू दुसरा तिसरा कोणी नसून इंग्लंडचा ओपनर जेसन रॉय होता. त्याने या सामन्यात जबरदस्त खेळी केली होती. पण एक चुकीचा फटका मारण्याच्या नादात फसला आणि गोलंदाजाला फुकटची विकेट देऊन बसला. कारण हा फटका मारताना स्वत:च चेंडू स्टम्पवर मारला.
डब्लिन गार्डियन्सने नाणेफेकीचा कौल जिंकला आणि प्रथम गोलंदाजी स्वीकारली. प्रथम फलंदाजी करताना ग्लास्गो कॉस्मिकने 20 षटकांत 5 बाद 183 धावा केल्या होत्या. सलामीला आलेल्या जेसन रॉयने 37 चेंडूंमध्ये 60 धावांची खेळी केली. त्याच्या अर्धशतकी खेळीमुळे ग्लासगो कॉस्मिक चांगल्या स्थिती आला होता. त्यामुळे त्याने जोखिम घेत फटकेबाजी करण्याची सुरूवात केली. पण 16 व्या षटकात हीच जोखीम त्याच्या अंगलट आली. वेगवान गोलंदाज मॅट होलार्टच्या गोलंदाजीच्या दुसऱ्या चेंडूवर विचित्र फटका मारण्याचा प्रयत्न केला आणि फसला. खरं तर जेसन रॉय असा फटका मारत नाही. त्यामुळे त्याचा प्रयोग फसला.
A perfect timed shot………….
………..goes & get’s Jason Roy out 🥲#ETPL pic.twitter.com/e2kacXx9CU
— European T20 Premier League (ETPL) (@etplofficial) August 29, 2026
होलार्डने ऑफ स्टम्पच्या बाहेर चेंडू टाकला होता. पण हा चेंडू खेळण्यासाठी जेसन रॉय आधीच बाहेर निघाला होता. त्याने या चेंडूवर स्कूप शॉट खेळून चेंडू फाइन लेगच्या दिशेने चौकार मारण्याचा प्रयत्न केला. पण चेंडू वेगाने आला आणि उसळी मात्र फारच कमी होती. त्यामुळे हा फटका मारताना टायमिंग चुकलं. चेंडू कनेक्ट केला पण थेट स्टंपवर आदळला. त्यामुळे जेसन रॉयला नशिबाला दोष देण्याशिवाय पर्याय नव्हता. त्यालाही तंबूकडे जाताना आपल्या नशिबावर हसावं लागलं.
ग्लासको कॉस्मिकने विजयासाठी दिलेल्या 183 धावांचा पाठलाग करताना डब्लिन गार्डियन्स संघाने नांगी टाकली. डब्लिन गार्डियन्सचा संघ 19.3 षटकांत सर्वबाद 150 धावाच करू शकला आणि 33 धावांनी पराभव झाला.
