IPL 2026, RR vs RCB: आयपीएल स्पर्धेतील राजस्थान विरूद्ध आरसीबी सामना, कोणाचं पारडं जड?
IPL 2026, RR vs RCB Head to Head: आयपीएल 2026 स्पर्धेतील 16व्या सामन्यात राजस्थान रॉयल्स आणि रॉयल चॅलेंजर्स बंगळुरू हे संघ आमनेसामने येणार आहेत. या सामन्यात कोण बाजी मारणार? याची उत्सुकता आहे. चला जाणून घेऊयात हेड टू हेड आकडेवारी..
आयपीएल 2026 स्पर्धेतील 16वा सामना राजस्थान रॉयल्स आणि रॉयल चॅलेंजर्स बंगळुरू यांच्यात होत आहे. दोन्ही संघांनी आतापर्यंत या स्पर्धेत चांगली कामगिरी केली आहे. राजस्थान रॉयल्सने तीन पैकी तीन सामन्यात विजय मिळवला आहे. तर रॉयल चॅलेंजर्स बंगळुरूने दोन सामने खेळले आणि दोन्ही सामन्यात विजय झाला आहे. त्यामुळे या दोन्ही संघात तूल्यबळ लढाई पाहायला मिळणार आहे. आता विजयाची माळ कोणाच्या गळ्यात पडणार याची उत्सुकता आहे. विजेत्या संघाला गुणतालिकेत अव्वल स्थान मिळणार हे निश्चित आहे. त्यामुळे ही लढाई चुरशीची असणार आहे. हा सामना राजस्थान रॉयल्सचं होमग्राउंड असलेल्या गुवाहाटीच्या बारसापरा क्रिकेट स्टेडियममध्ये होणार आहे. मागच्या सामन्यात राजस्थानने याच मैदानावर मुंबई इंडियन्सला 27 धावांनी पराभूत केलं होतं. आता समोर रॉयल चॅलेंजर्स बंगळुरूचं आव्हान असणार आहे.
राजस्थान रॉयल्स आणि आरसीबी हेड टू हेड
आयपीएल स्पर्धेत राजस्थान रॉयल्स आणि आरसीबी यांच्यात आतापर्यंत 34 सामने झाले आहेत. यात आरसीबीचा वजन अधिक असल्याचं दिसून आलं आहे. आरसीबीने 34 पैकी 17 सामन्यात विजय मिळवला आहे. तर राजस्थान रॉयल्सने 14 सामन्यात विजय मिळवला आहे. तीन सामने निकालाविना सुटले आहेत. आरसीबीची राजस्थानविरुद्ध सर्वाधिक स्कोअर हा 205 आणि किमान स्कोअर हा 70 आहे. राजस्थान रॉयल्सचा आरसीबीविरुद्ध सर्वाधिक स्कोअर हा 217 आणि किमान स्कोअर हा 58 आहे. मागच्या पर्वात या दोन्ही संघात दोन सामने झाले होते. दोन्ही सामना रॉयल चॅलेंजर्स बंगळुरूने जिंकले होते. आयपीएल 2024 मध्ये या उलट स्थिती होती. दोन्ही सामने राजस्थान रॉयल्सने जिंकले होते.
नाणेफेकीचा कौल आणि निकाल
नाणेफेकीच्या कौल जिंकण्यात राजस्थान रॉयल्स संघ पुढे आहे. 34 पैकी 18 सामन्यात नाणेफेकीचा कौल राजस्थानच्या बाजूने लागला आहे. तर 15 सामन्यात नाणेफेक आरसीबीने जिंकली आहे. नाणेफेक जिंकल्यानंतर राजस्थानने 10 सामन्यात विजय मिळवला आहे. यात 2 वेळा प्रथम फलंदाजी आणि 8 प्रथम गोलंदाजी घेऊन सामना जिंकला आहे. आरसीबीने 15 नाणेफेकीचे कौल जिंकले, त्यापैकी 11 सामने जिंकले आहेत. यात प्रथम फलंदाजी घेत 3 आणि गोलंदाजी घेत 8 सामने जिंकले आहेत.
