रॉयल चॅलेंजर्स बंगळुरु

रॉयल चॅलेंजर्स बंगळुरु फ्रँचायजीचे महिला आणि पुरुष हे 2 संघ डब्ल्यूपीएल आणि आयपीएल या स्पर्धेत प्रतिनिधित्व करतात. महिला संघाने डब्ल्यूपीएल स्पर्धेतील दुसऱ्या हंगामात ट्रॉफी उंचावली. सांगलीकर स्मृती मंधाना हीने तिच्या नेतृत्वात आरसीबीला 2024 मध्ये पहिलीवहिली ट्रॉफी मिळवून दिली. मात्र आरसीबीला गतविजेता म्हणून 2025 वर्षात दबदबा कायम राखता आला नाही. त्यामुळे आरसीबीने भविष्यात चमकदार कामगिरी करुन पुन्हा एकदा ट्रॉफी उंचवावी, अशी आशा चाहत्यांना असणार आहे. तसेच आरसीबीच्या पुरुष संघाने तब्बल 18 वर्षांनी पहिल्यांदा 2025 मध्ये आयपीएल ट्रॉफी उंचावून चाहत्यांची प्रतिक्षा संपवली. आरसीबीला त्याआधी 3 वेळा अंतिम फेरीत पराभूत व्हावं लागलं होतं. मात्र रजत पाटीदार याच्या नेतृत्वात आरसीबीने 2025 साली आयपीएल ट्रॉफीवर नाव कोरलं. स्टार फलंदाज आणि माजी कर्णधार विराट कोहली हा आयपीएलच्या पहिल्या मोसमापासून आरसीबीचं प्रतिनिधित्व करत आहे.