IPL 2026 : आरसीबी प्लेऑफमध्ये, 3 जागांसाठी 7 संघांत चुरस, केकेआर-पंजाबला किती संधी?

आयपीएल 2026 स्पर्धेतील (IPL 2026) प्लेऑफचं वेळापत्रक काही आठवड्यांआधी जाहीर करण्यात आलं. तेव्हापासून क्रिकेट चाहत्यांना प्लेऑफमध्ये पोहचणाऱ्या अंतिम 4 संघांची प्रतिक्षा आहे. दरवर्षी प्लेऑफसाठी चुरस असते. टॉप 2 मध्ये आपलं आव्हान राखणाऱ्या संघांना अंतिम फेरीत पोहचण्याची 1 संधी जास्त मिळते. त्यामुळे टॉप 2 साठी चढाओढ असते. मात्र यंदा चित्र उलट आहे. या 19 व्या हंगामात तब्बल 61 सामन्यांच्या प्रतिक्षेनंतर प्लेऑफसाठी पहिला संघ अधिकृतरित्या पात्र ठरला. रविवारी 17 मे रोजी डबल हेडरमधील पहिल्या सामन्यात पंजाब किंग्स विरुद्ध गतविजेता रॉयल चॅलेंजर्स बंगळुरु आमनेसामने होते. आरसीबीने पंजाबला पराभूत करत प्लेऑफचं तिकीट मिळवलं. त्यामुळे आता उर्वरित 3 जागांसाठी चुरस आहे. या निमित्ताने कोणत्या संघाला प्लेऑफची किती संधी आहे? हे जाणून घेणार आहोत.

रविवारी 17 मे पर्यंत 19 व्या मोसमातील 62 सामने खेळवण्यात आले. आता साखळी फेरीतील आणखी 8 सामने बाकी आहेत. मात्र त्यानंतरही प्लेऑफचा पेच कायम आहे. प्लेऑफसाठी 1 संघ निश्चित झाला आहे. तर 3 जागा रिक्त आहेत. या 3 जागांसाठी 7 संघांत चुरस आहे.

2 संघांचा पत्ता कट

या हंगामातून लखनौ सुपर जायंट्स आणि मुंबई इंडियन्सचं पॅकअप झालंय. तर आरसीबी प्लेऑफमध्ये पोहचली आहे. त्यामुळे 3 संघांचा विषय संपलाय. तसेच 3 जागांसाठी 7 संघ शर्यतीत आहेत. मात्र त्यापैकी काही संघांची शक्यता इतरांच्या तुलनेत कमी आहे. गुजरात टायन्टस, सनरायझर्स हैदराबाद, पंजाब किंग्स, चेन्नई सुपर किंग्स, राजस्थान रॉयल्स, दिल्ली कॅपिट्ल्स आणि कोलकाता नाईट रायडर्स हे 7 संघ प्लेऑफच्या शर्यतीत आहेत.

18 मे रोजीचा सामना निर्णायक

आरसीबीनंतर सलग दुसऱ्या दिवशी प्लेऑफसाठी आणखी एक संघ निश्चित होऊ शकतो. गुजरात टायटन्स प्लेऑफमध्ये पोहचणारा दुसरा संघ ठरु शकतो. गुजरातच्या खात्यात 16 गुण आहेत. आयपीएल 2026 स्पर्धेत आज 18 मे रोजी चेन्नई सुपर किंग्स विरुद्ध सनरायझर्स हैदराबाद असा सामना होणार आहे. गुजरातला आजच प्लेऑफचं तिकीट मिळणार की नाही? हे या सामन्याच्या निकालावर अवलंबून असणार आहे.

हैदराबादने चेन्नईला पराभूत केल्यास ऑरेंज आर्मीसह गुजरात प्लेऑफसाठी पात्र ठरेल. मात्र चेन्नई विजयी झाल्यास गुजरातसाठी चेन्नई विरुद्ध आगामी सामना निर्णायक ठरेल. गुजरात तो सामना जिंकूनही सहज प्लेऑफमध्ये पोहचू शकेल. तसेच गुजरात पराभवानंतर प्लेऑफसाठी पात्र ठरेल. मात्र गुजरातला या दरम्यान नेट रनरेटकडे लक्ष द्यावं लागेल.

हैदराबादचं प्लेऑफचं समीकरण

सनरायझर्स हैदराबाद म्हणजे ऑरेंज आर्मीचे साखळी फेरीतील 2 सामने बाकी आहेत. हैदराबादकडे चेन्नईला पराभूत करुन आजच प्लेऑफमधील आपलं स्थान निश्चित करण्याची संधी आहे. मात्र तसं न झाल्यास हैदराबादकडे आणखी 1 संधी आहे. हैदराबाद आरसीबीला पराभूत करुन प्लेऑफमध्ये पोहचू शकते. तसेच गुजरात राजस्थान रॉयल्स आणि चेन्नई सुपर किंग्स या 3 संघांनाही 16 गुणांपर्यंत पोहचण्याची संधी आहे. त्यामुळे हैदराबादला नेट रनरेटकडे लक्ष ठेवावं लागेल.

पंजाबचा सलग सहावा पराभव, आता किती संधी?

पंजाब 19 व्या मोसमात पहिल्या 7 पैकी 6 सामने जिंकून अजिंक्य होती. मात्र त्यानंतर पंजाबचा सलग 6 सामन्यांत पराभव झाला. आता पंजाबसमोर त्यांच्या मोहिमेतील शेवटच्या सामन्यात लखनौचं आव्हान असणार आहे. लखनौचं स्पर्धेतून पॅकअप झालंय. त्याामुळे लखनौकडे गमावण्यासाठी काहीच नाही. मात्र लखनौने विजय मिळवून पंजाबचा गेम ओव्हर करु शकते. त्यामुळे पंजाबला कोणत्याही स्थितीत सामना जिंकावा लागेल. त्यानंतरही पंजाबचा प्लेऑफ प्रवेश निश्चित नाहीय.

पंजाबला इतर संघांवर अवलंबून रहावं लागणार आहे. चेन्नई आणि राजस्थानचा प्रत्येकी 1-1 सामन्यात पराभव व्हावा. तसेच केकेआरचा पराभव व्हावा किंवा कोलकाताने कमी फरकाने सामना जिंकावा. वरील 3 समीकरण जुळले तरच पंजाब 15 गुणांवर प्लेऑफसाठी पात्र ठरेल. त्यामुळे पंजाबचं प्लेऑफचं समीकरण किचकट असल्याचं स्पष्ट आहे.

यलो आर्मीचं समीकरण काय?

चेन्नईचे साखळी फेरीतील 2 सामने बाकी आहेत. त्यापैकी चेन्नईसमोर आज सनरायझर्स हैदराबादचं आव्हान असणार आहे. चेन्नईला प्लेऑफसाठी हैदराबादसह गुजरात टायटन्सला पराभूत करावं लागेल. तसेच चेन्नईला नेट रनरेटचाही विचार करावा लागेल, त्याचं कारणही तसंच आहे. गुजरात, हैदराबाद आणि राजस्थान यांच्याकडेही 16 गुणांपर्यंत पोहचण्याची संधी आहे.

हैदराबादने उर्वरित दोन्ही सामने गमावल्यास चेन्नईला दोन्ही सामने जिंकून प्लेऑफचं कन्फर्म तिकीट मिळेल. तसेच राजस्थानचाही एका सामन्यात पराभव झाल्यास चेन्नईकडे दोन्ही सामने जिंकून टॉप 4 मध्ये राहण्याची संधी आहे.

राजस्थानचं समीकरण कसं?

आयपीएल 2026 स्पर्धा अशा वळणावर येऊन ठेपलीय की जिथे एका सामन्याच्या निकालानंतर प्लेऑफचं समीकरण बदलतंय. आता राजस्थानचं समीकरणही असंच आहे. राजस्थानला 16 गुणांपर्यंत पोहचण्याची संधी आहे. मात्र राजस्थानचं भवितव्य हे चेन्नईच्या कामगिरीवर अवलंबून आहे. चेन्नईसमोर आज हैदराबादचं आव्हान आहे. तसेच चेन्नई साखळी फेरीतील शेवटच्या सामन्यात गुजरात विरुद्ध भिडणार आहे. त्यामुळे चेन्नईचा या 2 पैकी एका सामन्यात पराभव झाल्यास तो राजस्थानसाठी प्लेऑफच्या हिशोबाने फायदेशीर ठरेल. तसेच चेन्नई किंवा हैदराबादपैकी कोणत्याही एका संघाने दोन्ही सामने गमावले तर राजस्थान टॉप 4 मध्ये कायम राहिल.

दिल्ली कॅपिट्ल्स

दिल्ली कॅपिटल्सही प्लेऑफच्या शर्यतीत आहे. मात्र दिल्लीचं प्लेऑफचं समीकरण हे स्वत:पेक्षा दुसऱ्यांवर जास्त अवलंबून आहे. दिल्लीला प्लेऑफसाठी सर्वात आधी केकेआर विरुद्धचा सामना जिंकावा लागेल. दिल्लीने पंजाबला पराभूत करावं. राजस्थान आणि सीएसकेने उर्वरित दोन्ही सामने गमवालेत. हैदराबादने चेन्नईला पराभूत करावं. वरील सर्व समीकरणं जुळल्यास दिल्ली चौथ्या स्थानासाठी पात्र ठरु शकते, जे शक्य नाहीच, असं म्हटलं तर वावगं ठरणार नाही.

केकेआरला सर्वात कमी संधी

केकेआर पहिल्या 7 सामन्यांत विजयाचं खातं उघडण्यात अपयशी ठरली होती. मात्र केकेआरने त्यानंतर जोरदार कमबॅक केलं. केकेआरने प्लेऑफमधील आपलं आव्हान कायम राखलंय. मात्र केकेआरला प्लेऑफची सर्वात कमी संधी आहे.

केकेआरला उर्वरित 2 सामने जिंकावे लागतील. पंजाबचा शेवटच्या सामन्यात पराभव व्हावा. राजस्थानने 1 सामना जिंकावा. तसेच हैदराबादने चेन्नईला पराभूत करावं. वरील समीकरण जुळल्यास केकेआरची प्लेऑफची शक्यता वाढेल. अशात आता कोणते 3 संघ यशस्वी ठरतात आणि कोणत्या आणखी 4 संघांचं पॅकअप होतं हे पाहणं महत्त्वाचं ठरणार आहे.