वर्ल्ड कप 2027 जवळ येतोय, पण रोहित शर्माची बॅटिंग देतेय वेगळाच संकेत; ‘वन-मॅच वंडर’ पॅटर्न का चर्चेत?

पुढील वर्षी दक्षिण आफ्रिका, झिम्बाब्वे आणि नामिबिया येथे एकदिवसीय विश्वचषक होणार आहे. या विश्वचषकाला बरोबर एक वर्ष शिल्लक असताना भारतात एक जोरदार चर्चा सुरू झाली आहे. त्या स्पर्धेसाठी रोहित शर्मा भारतीय संघात असेल का? सध्या तरी बीसीसीआय त्याला पूर्ण पाठिंबा देत आहे. परंतु रोहितच्या स्वतःच्या कामगिरीमुळे अनेक प्रश्न निर्माण होत आहेत.

विशेषतः गेल्या वर्षभरात त्याच्या फलंदाजीत एक विशिष्ट पद्धत दिसून आली आहे. ज्यामुळे हा प्रश्न उपस्थित होतो की, रोहित हा केवळ एका सामन्यापुरता मर्यादित राहणारा फलंदाज आहे का? या प्रश्नाची कारणे गेल्या वर्षभरातील विविध एकदिवसीय मालिकांच्या आकडेवारीमध्ये दडलेली आहेत. वेस्ट इंडिजविरुद्धच्या पहिल्या एकदिवसीय सामन्यानंतर या प्रश्नाला अधिकच बळ मिळाले आहे.

तिरुवनंतपुरम येथे खेळल्या गेलेल्या पहिल्या एकदिवसीय सामन्यात रोहितने ३५ चेंडूंमध्ये केवळ ३२ धावा केल्या. त्याने जोरदार सुरुवात केली होती.पण काही चौकार मारल्यानंतर तो अडकला आणि बाद झाला. अशाप्रकारे मालिकेतील पहिला सामना त्याच्यासाठी चांगला ठरला नाही. पण असे पहिल्यांदाच घडत नाही. हा एक प्रश्न तसेच चिंतेचा विषय बनला आहे. आकडेवारीनुसार, २०२५ च्या चॅम्पियन्स ट्रॉफीपासून रोहित शर्माने खेळलेल्या कोणत्याही एकदिवसीय मालिकेच्या सलामीच्या सामन्यांमध्ये चांगली कामगिरी केलेली नाही.

याचा अर्थ असा की, तो मालिकेच्या पहिल्या दोन सामन्यांमध्ये चांगली कामगिरी करत नाही. पण अंतिम सामन्यात मोठी धावसंख्या उभारतो. वेस्ट इंडिजविरुद्धच्या पहिल्या सामन्यातही हे स्पष्ट दिसून आले. गेल्या दीड वर्षात रोहित शर्माने अनेक एकदिवसीय मालिकांमधील पहिल्या दोन सामन्यांसह एकूण ११ डावांमध्ये फलंदाजी केली आहे. या ११ डावांमध्ये त्याने ३०.४ च्या सरासरीने केवळ ३३५ धावा केल्या असून त्यात फक्त दोन अर्धशतकांचा समावेश आहे.

याउलट मालिकेतील तिसऱ्या आणि अंतिम सामन्याच्या पाच डावांमध्ये त्याने दोन शतके आणि दोन अर्धशतकांसह १०६ च्या आश्चर्यकारक सरासरीने ४२४ धावा केल्या. इंग्लंडविरुद्धच्या एकदिवसीय मालिकेतील पहिल्या दोन सामन्यांमध्ये अपयशी ठरल्यानंतर रोहितने अंतिम सामन्यात शतक झळकावले. दुसऱ्या एकदिवसीय सामन्यानंतर रोहितला संघातून वगळण्यात आल्याच्या बातम्या प्रसारमाध्यमांमध्ये आल्यानंतर त्याने हे शतक झळकावले. यामुळे मोठा गदारोळ झाला.

यानंतर बीसीसीआयचे सचिव देवजित सैकिया यांनाही ‘हिटमॅन’ संघात कायम राहील, असे स्पष्टीकरण द्यावे लागले. त्यानंतर मुख्य निवडकर्ता अजित आगरकर या गोष्टीमुळे नाराज होते. त्यामुळे त्यांनी त्याचा कार्यकाळ न वाढवण्याचा निर्णय घेतला, अशा बातम्या समोर आल्या.