IPL 2026 : 3 संघांची 18 वर्षांपासून चॅम्पियन होण्याची प्रतिक्षा कायम, आरसीबीनंतर कोण उंचावणार ट्रॉफी?
IPL 2026 : आयपीएल स्पर्धेतील सुरुवातीच्या काही हंगामात 8 संघ सहभागी झाले होते. त्यानंतर आता गेल्या काही मोसमांपासून सातत्याने 10 संघ सहभागी होत आहेत. या 10 पैकी 3 संघांना अजूनही एकदाही आयपीएल ट्रॉफी जिंकता आलेली नाही.
आयपीएल स्पर्धेतील 19 व्या मोसमाला 28 मार्चपासून सुरुवात होणार आहे. या 19 व्या मोसमासाठी एकूण 10 संघांनी आतापर्यंत जोरदार सराव केला आहे. मुंबई इंडियन्स आणि चेन्नई सुपर किंग्स हे या स्पर्धेच्या मोसमातील 2 यशस्वी संघ आहेत. दोन्ही संघांनी प्रत्येकी 5-5 वेळा आयपीएल ट्रॉफी जिंकण्याची कामगिरी केली आहे. एका बाजूला या 2 संघांनी 5-5 वेळा ट्रॉफी उंचावली आहे. तर दुसऱ्या बाजूला असे काही संघ आहेत ज्यांची गेल्या 18 वर्षांपासून आयपीएल चॅम्पियन होण्याची प्रतिक्षा कायम आहे. त्यामुळे यंदा या तिघांपैकी कोणता संघ आपली प्रतिक्षा संपवणार? हे पाहणं महत्त्वाचं ठरणार आहे.
3 संघांची आयपीएल ट्रॉफीची प्रतिक्षा कायम
लखनौ सुपर जांयट्स, पंजाब किंग्स आणि दिल्ली कॅपिट्ल्स या 3 संघांना आतापर्यंत एकदाही आयपीएल चॅम्पियन होण्याचा बहुमान मिळवता आलेला नाही. या 3 संघांप्रमाणे आरसीबी अर्थात रॉयल चॅलेंजर्स बंगळुरु टीमचंही गेल्या 17 मोसमापासून आयपीएल ट्रॉफी जिंकण्याचं स्वप्न होतं. आरसीबीचं हे स्वप्न 18 व्या मोसमात पूर्ण झालं. रजत पाटीदार याच्या नेतृत्वात आरसीबीने 18 वर्षांची प्रतिक्षा संपवली. त्यामुळे यंदा या तिघांपैकी कोणता संघ आरसीबीप्रमाणे आयपीएल ट्रॉफीची प्रतिक्षा संपवण्यात यशस्वी ठरतो याकडे क्रिकेट चाहत्यांचं लक्ष असणार आहे.
पंजाब आणि दिल्ली दोन्ही संघ आयपीएलच्या पहिल्या मोसमापासून खेळत आहेत. तर लखनौचं 2022 साली या स्पर्धेत पदार्पण झालं. लखनौचं यंदाचं पाचवं वर्ष आहे. लखनौप्रमाणे गुजरातनेही 2022 साली आयपीएलमध्ये एन्ट्री केली होती. मात्र गुजरातने हार्दिक पंड्या याच्या नेतृत्वात पहिल्याच मोसमात आयपीएल चॅम्पियन होण्याचा बहुमान मिळवला होता. तर लखनौ, पंजाब आणि दिल्ली यांची पहिल्या मोसमापासून ट्रॉफीची प्रतिक्षा कायम आहे.
टीमचं नाव बदललं, मात्र नशिब बदलेना
दिल्ली आणि पंजाब या संघांचं नाव बदललंय. नाव बदलून काही चमत्कार होतो का? हा प्रयोगही दिल्ली आणि पंजाबकडून करण्यात आला. मात्र त्याचा काहीही फायदा झाला नाही. दिल्ली कॅपिट्ल्सचं आधीचं नाव हे दिल्ली कॅपिट्ल्स असं होतं. तर पंजाब किंग्स आधी किंग्स इलेव्हन पंजाब होती.
पंजाब 2 तर दिल्ली 1 वेळ उपविजेता
दरम्यान आतापर्यंत पंजाबचं 2 वेळा तर दिल्लीचं एकदा आयपीएल चॅम्पियन होण्याचं स्वप्न भंगलंय. किंग्स इलेव्हन पंजाब 2014 तर पंजाब किंग्स 2025 साली उपविजेता राहिली. तर दिल्ली कॅपिट्ल्स 2020 साली आयपीएल ट्रॉफीपासून 1 पाऊल दूर राहिली होती.
