Anvay Dravid: राहुल द्रविडच्या मुलाची खणखणीत बॅटींग, अवघ्या 41 चेंडूत… समोरच्या गोलंदाजाचा करून टाकला पालापाचोळा

विनू मांकड ट्रॉफी २०२६ च्या ४३ व्या सामन्यात कर्नाटकच्या १९ वर्षांखालील संघाने दिल्लीच्या १९ वर्षांखालील संघाचा १९८ धावांनी पराभव केला. या सामन्यात भारताचे माजी कर्णधार आणि मुख्य प्रशिक्षक राहुल द्रविड यांचा धाकटा मुलगा अन्वय द्रविड आपल्या फलंदाजीच्या पराक्रमामुळे नेहमीच चर्चेत असतो. अन्वयने आपल्या स्फोटक फलंदाजीने देशांतर्गत क्रिकेटमध्ये खळबळ उडवून दिली आहे. विशाखापट्टणम येथे झालेल्या १९ वर्षांखालील विनू मांकड ट्रॉफी सामन्यादरम्यान अन्वयने आपल्या कामगिरीने चाहत्यांचे लक्ष वेधून घेतले.

या १७ वर्षीय यष्टीरक्षक-फलंदाजाने दिल्लीविरुद्ध अवघ्या ४१ चेंडूंमध्ये ८५ धावांची धडाकेबाज खेळी करून सर्वांचे लक्ष वेधून घेतले. आपल्या खेळीदरम्यान कर्नाटकचा कर्णधार अन्वयने मैदानाच्या सर्व बाजूंनी फटकेबाजी केली. त्याने तो केवळ बचावात्मकच नाही, तर आधुनिक क्रिकेटची आक्रमक शैली खेळण्यातही पारंगत आहे हे सिद्ध केले. अन्वयने आपल्या शानदार खेळीत पाच उत्तुंग षटकार आणि सात अप्रतिम चौकार ठोकले.

२०७.३२ च्या स्ट्राईक रेटने धावा करत त्याने दिल्लीच्या गोलंदाजांना चकित केले. गेल्याच आठवड्यात चंदीगडविरुद्ध शतक (६२ चेंडूंत १०४ धावा) झळकावणाऱ्या अन्वयने पुन्हा एकदा आपला उत्कृष्ट फॉर्म दाखवला आहे. प्रथम फलंदाजी करताना कर्नाटकने ४९ षटकांत ४ गडी गमावून ४१८ धावांचा डोंगर उभा केला. ध्रुव कृष्णानेही संघासाठी शानदार फलंदाजी करत अवघ्या ५१ चेंडूंमध्ये १०३ धावांचे शतक झळकावले.

खेळपट्टीवर आलेल्या कर्णधार अन्वयने डावाला अंतिम स्वरूप देत धावसंख्या ४०० च्या पुढे नेली. दिल्लीच्या ४१९ धावांच्या प्रत्युत्तरात त्यांचा संघ २२० धावांवर सर्वबाद झाला. परिणामी अन्वयच्या नेतृत्वाखालील कर्नाटक संघाने १९८ धावांच्या मोठ्या फरकाने विजय मिळवला. अन्वयने आपल्या यष्टीरक्षण, कर्णधारपद आणि आक्रमक फलंदाजीच्या जोरावर भारतीय १९ वर्षांखालील क्रिकेटमध्ये सातत्याने वर्चस्व गाजवले आहे.

विनू मांकड अंडर-१९ स्पर्धेच्या एलिट टप्प्यात एकूण ३० संघ सहभागी झाले आहेत . पाच एलिट गटांमध्ये प्रत्येकी सहा संघांची विभागणी करण्यात आली आहे. हा गट ‘इ’ मधील दिल्ली आणि कर्नाटक यांच्यातील सामना होता. आपल्या तीनपैकी दोन सामने जिंकून, अन्वय द्रविडच्या नेतृत्वाखालील कर्नाटक संघ आठ गुणांसह गटात आघाडीवर आहे. दरम्यान, आपल्या तीनपैकी दोन सामने गमावलेला दिल्ली संघ सहाव्या स्थानावर आहे.