RCB vs KKR : विराटचा शतकी तडाखा, आरसीबीचा जबरदस्त विजय, केकेआरचा 6 विकेट्सने धुव्वा
Royal Challengers Bengaluru vs Kolkata Knight Riders, Match Result : रायपूरमधील शहीद वीर नारायण सिंह आंतरराष्ट्रीय स्टेडियममध्ये गतविजेत्या रॉयल चॅलेंजर्स बंगळुरुने केकेआरवर एकतर्फी फरकाने विजय मिळवत 2 गुणांची कमाई केली.
अनुभवी फलंदाज विराट कोहली याने केलेल्या नाबाद आणि विस्फोटक शतकी खेळीच्या जोरावर रॉयल चॅलेंजर्स बंगळुरुने कोलकाता नाईट रायडर्सवर आयपीएल 2026 स्पर्धेतील (IPL 2026) 57 व्या सामन्यात जबरदस्त असा विजय मिळवला आहे. अंगकृष रघुवंशी आणि रिंकु सिंह या दोघांनी केलेल्या खेळीच्या जोरावर केकेआरने आरसीबीसमोर 193 धावांचं आव्हान ठेवलं होतं. आरसीबीने हे आव्हान 5 बॉलआधी 6 विकेट्स राखून सहज पूर्ण केलं. आरसीबीने 19.1 ओव्हरमध्ये 194 धावा केल्या. आरसीबीने अशाप्रकारे 2 गुणांची कमाई केली. आरसीबीचा हा आठवा तर केकेआर विरुद्धचा पहिला विजय ठरला. आरसीबीने विजयासह प्लेऑफचा दावा आणखी मजबूत केला आहे.
आरसीबीची बॅटिंग
विराट कोहली आणि जेकब बेथेल या सलामी जोडीने विजयी धावांचा पाठलाग करताना संयमी सुरुवात करुन दिली. दोघांनी पहिल्या विकेटसाठी 20 बॉलमध्ये 37 रन्स जोडल्या. जेकबच्या रुपात आरसीबीने पहिली विकेट गमावली. जेकबने 15 रन्स केल्या. त्यानंतर विराट आणि देवदत्त पडीक्कल या दोघांनी दुसऱ्या विकेटसाठी निर्णायक पार्टनरशीप करुन आरसीबीचा विजय निश्चित केला.
विराट आणि देवदत्तने 59 चेंडूत 92 धावांची भागीदारी केली. देवदत्तला अर्धशतकाची संधी होती. मात्र कार्तिक त्यागीने देवदत्तला कॅप्टन अजिंक्य रहाणे याच्या हाती कॅच आऊट केलं. देवदत्तने 39 धावा केल्या. त्यानंतर विराटने तिघांसोबत धावा जोडून आरसीबीला विजयी केलं.
विराटची नाबाद शतकी खेळी
कॅप्टन रजत पाटीदार याने 11 आणि टीम डेव्हिड याने 2 धावा केल्या. तर विराट आणि जितेश शर्मा हे दोघे आरसीबीला विजयी करुन नाबाद परतले. जितेशने 8 धावा जोडल्या. तर विराटने सर्वाधिक धावा केल्या. विराटने 60 बॉलमध्ये 175 च्या स्ट्राईक रेटने नॉट आऊट 105 रन्स केल्या. विराटने या खेळीत 3 षटकार आणि 11 चौकार लगावले. केकेआरसाठी कार्तिक त्यागी याने 3 विकेट्स मिळवल्या. तर सुनील नारायण याने 1 विकेट मिळवली.
स्कोअरकार्ड
केकेआरची बॅटिंग
आरसीबीने टॉस जिंकून केकेआरला बॅटिंगसाठी बोलावलं. केकेआरसाठी टॉप 5 फलंदाजानी योगदान दिलं. त्यामुळे केकेआरला 4 विकेट्स गमावून 192 धावांपर्यंत पोहचता आलं. केकेआरसाठी अंगकृष रघुवंशी याने सर्वाधिक धावा केल्या. अंगकृषने 71 धावा केल्या. कॅप्टन अजिंक्य रहाणे याने 19 तर फिन एलन याने 18 धावा जोडल्या. कॅमरुन ग्रीन याने 32 धावा जोडल्या. तर रिंकू सिंह याने अखेरच्या क्षणी नाबाद 49 धावांची खेळी केली. तर आरसीबीसीठी रसीख सलाम डार, भुवनेश्वर कुमार आणि जोश हेझलवूड या तिघांनी प्रत्येकी 1-1 विकेट मिळवली.
