टी20 वर्ल्डकप स्पर्धेतून गाशा गुंडाळताच अफगाणिस्तानने कोच बदलला, आता रिचर्ड पायबस यांची नियुक्ती
टी20 वर्ल्डकप 2026 स्पर्धेत अफगाणिस्तानची कामगिरी निराशाजनक राहिली. अफगाणिस्तानने मागच्या पर्वात उपांत्य फेरीपर्यंत धडक मारली होती. मात्र यंदा साखळी फेरीतच आव्हान संपुष्टात आलं आहे. असं असताना अफगाणिस्तानने मुख्य प्रशिक्षक बदलला आहे.
टी20 वर्ल्डकप स्पर्धेत अफगाणिस्तानला गाशा साखळी फेरीतच गुंडाळावा लागला. या स्पर्धेत काही उलटफेर करण्याची अपेक्षा होती. मात्र तसं काही घडलं नाही. साखळी फेरीत चार पैकी दोन सामन्यात विजय मिळवला आणि दोन सामन्यात पराभवाचं तोंड पाहावं लागलं. त्यामुळे पदरात 4 गुण पडले. पण सुपर 8 फेरीचं गणित काही जुळवता आलं नाही. त्यामुळे साखळी फेरीतूनच संघ घरी परतला आहे. यासह मुख्य प्रशिक्षक जोनाथन ट्रॉट यांचा कार्यकाळही संपला. त्यानतंर अफगाणिस्तानने मंगळवारी रिचर्ड पायबस यांची मुख्य प्रशिक्षक म्हणून नियुक्ती केली आहे. 61 वर्षीय पायबस यांची आंतरराष्ट्रीय पातळीवर एक प्रतिष्ठित प्रशिक्षक म्हणून कारकिर्द आहे. त्यांनी यापूर्वी पाकिस्तान आणि वेस्ट इंडिजच्या प्रशिक्षकपदाची भूमिका बजावली आहे.
पुढच्या महिन्यात अफगाणिस्तान आणि श्रीलंका यांच्यात व्हाईट बॉल क्रिकेट मालिका सुरू होईल त्या आधीच पायबस हे अफगाणिस्तान संघासोबत काम करण्यास सुरूवात करतील. अफगाणिस्तान क्रिकेट बोर्डाने माहिती देताना सांगितलं की, ‘पायबस यांचा प्रशिक्षकपदाचा कार्यकाळ जबरदस्त राहिला आहे. त्यांनी 2013 ते 2019 या कालावधीत वेस्ट इंडिज संघासोबत काम केलं आहे. या काळात त्यांनी वेस्ट इंडिज संघ बांधणीत मोलाचं सहकार्य केलं. त्यांच्या कार्यकाळात वेस्ट इंडिजने 2016 आयसीसी वर्ल्डकप जिंकला. याच वेस्ट इंडिजच्या पुरूष, महिला आणि अंडर 19 वर्ल्डकप स्पर्धेतील जेतेपद जिंकली. एकाच वर्षात तीन जेतेपद मिळवून ऐतिहासिक नोंद झाली होती. ‘
ACB Appoint Richard Pybus as National Team Head Coach
ACB is pleased to announce the appointment of Richard Pybus as Afghanistan’s new head coach. He will join AfghanAtalan ahead of the upcoming white-ball series against Sri Lanka in March.
Read More: https://t.co/H0dAAElOFc pic.twitter.com/wLoE5x3450
— Afghanistan Cricket Board (@ACBofficials) February 24, 2026
‘मागच्या काळात पायबस यांनी पाकिस्तान क्रिकेट संघाच्या मुख्य प्रशिक्षकपदाची धुरा सांभाळली. त्यांच्या मार्गदर्शनाखाली 1999 मध्ये पाकिस्तानने वनडे वर्ल्डकप स्पर्धेची अंतिम फेरी गाठली होती. पण ऑस्ट्रेलियाकडून पराभव झाला. त्यांनी बांगलादेश क्रिकेट बोर्डासोबतही काम केलं हे. 2013 साली त्यांनी वरिष्ठ मार्गदर्शक म्हणून भूमिका बजावली. इतकंच काय देशांतर्गत पातळीवरही त्यांनी प्रशिक्षण दिलं आहे. दक्षिण अफ्रिकेच्या देशांतर्गत पातळीवर आणि फ्रेंचायझी क्रिकेटमध्ये प्रशिक्षक म्हणून भूमिका पार पाडली आहे. त्याच्या मार्गदर्शनाखाली संघाने जेतेपद मिळवलं होतं. त्यांना दोनदा दक्षिण आफ्रिकेचा वर्षातील सर्वोत्तम क्रिकेट प्रशिक्षक म्हणून गौरविण्यात आले. ‘ असंही अफगाणिस्तान क्रिकेट बोर्डाने सांगितलं.
