सचिन तेंडुलकर या भन्नाट वेबसिरीच्या प्रेमात, वायुसेनेला थेट पत्र लिहिलं, म्हणाला…

मास्टर ब्लास्टर सचिन तेंडुलकर याची सोशल मीडियावरील पोस्ट चर्चेत आहे. त्याने या पोस्टमध्ये ऑपरेशन सफेद सागर वेब सीरिजचा उल्लेख केला आहे. त्यामुळे ज्यांनी ही वेब सीरिज पाहिली नाही त्यांच्या मनात प्रचंड उत्सुकता निर्माण झाली आहे. मास्टर ब्लास्टर सचिन तेंडुलकरने नेटफ्लिक्सवरील ‘ऑपरेशन सफेद सागर’ ही सीरिज पाहिल्यानंतर वायुसेनेच्या जवानांसाठी एक खुले पत्र लिहिलं आहे. त्यात सचिनने त्यांच्या शौर्याचे व त्यागाचे कौतुक केले आहे. सचिन तेंडुलकरने मीडियावर एअर चीफ मार्शल बी एस धनोआ यांच्यासोबत एक जुना फोटो पोस्ट करून आपल्या भावना व्यक्त केल्या आहेत. 1999 मधील कारगिल युद्धावर आधारित या वेब सीरिजने सचिनच्या मनाला स्पर्श केला असून त्याने भारतीय हवाई दलाच्या धैर्याला कडक सॅल्यूट ठोकला आहे. जिमी शेरगिल याने बीएस धानोआ यांची भूमिका या वेब सीरिजमध्ये साकारली आहे.

मास्टर ब्लास्टर सचिन तेंडुलकरने सोशल मीडियावर पोस्ट लिहित सांगितलं की, ‘प्रिय भारतीय वायुसेना, नुकतीच ऑपरेशन सफेद सागर ही वेब सीरिज पाहिली. ही सीरिज पाहिल्यानंतर मला जाणीव झाली की, सीमेवर प्रचंड मानसिक दबाव आणि अनिश्चितता सहन करणाऱ्या जवानांचे आयुष्य आपल्यापेक्षा किती वेगळे असते. शत्रूचा सामना करत डोळ्यात तेल घालून पहारा देतात, म्हणूनच आपल्यासारखे नागरिक देशात शांतपणे झोपू शकतात आणि आपले दैनंदिन जीवन जगू शकतात. मी काही वर्षांपूर्वी एअर चीफ मार्शल बी एस धनोआ यांना भेटलो होतो. कारगिल युद्धादरम्यान त्यांनी आणि त्यांच्या सहकाऱ्यांनी ज्या कठीण परिस्थितीचा सामना केला, ते या सीरिजमध्ये पाहिल्यानंतर माझ्या मनात त्या जुन्या भेटीबद्दलचा आदर आणि कृतज्ञता अधिक वाढली आहे. ‘ 2010 मध्ये वायुसेनेने सचिन तेंडुलकरला ग्रुप कॅप्टन या मानद पदाने सन्मानित केलं होतं.

Dear @IAF_MCC,

Just finished watching Operation Safed Sagar. It made me think about how different life is for the people who are out there, carrying the pressure and uncertainty, while the rest of us are able to sleep peacefully and carry on with our everyday lives.

I had met… pic.twitter.com/vbwzmpxIUx

— Sachin Tendulkar (@sachin_rt) September 1, 2026

सचिन तेंडुलकरने पुढे सांगितलं की, ‘हे धाडस विलक्षण आहे. त्यामागील शिस्त आणि मानसिक सामर्थ्यही आश्चर्यकारक आहे. भारतीय हवाई दलात सेवा करण्याची संधी मिळाल्याबद्दल मी स्वतःला भाग्यवान समजतो आणि त्याची मूल्ये मला समजतात. ही कहाणी पाहून माझी कृतज्ञता अधिकच वाढली आहे. तुम्ही आमच्यासाठी जे काही करता त्याबद्दल धन्यवाद. जय हिंद! ‘

कारगिल युद्धात बी एस धनोआ विंग कमांडर होते आणि त्यांनी नंबर 17 स्काड्रन गोल्डन एरोजची कमान सांभाळली होती. मिग-21 लढाऊ विमानांनी सुसज्ज असलेल्या या स्क्वाड्रनने ‘ऑपरेशन सफेद सागर’मध्ये सहभाग घेतला होता.