T20 World Cup 2026 Semi Final SA vs NZ : उपांत्य फेरीसाठी दोन्ही संघ या खेळाडूंवर टाकतील विश्वास!
टी20 वर्ल्डकप 2026 स्पर्धा आता अंतिम टप्प्यात आली आहे. उपांत्य फेरीचा पहिला सामना दक्षिण अफ्रिका आणि न्यूझीलंड यांच्यात होत आहे या सामन्याकडे क्रीडाप्रेमींच्या नजरा लागून आहेत. प्लेइंग 11 काय असेल याबाबत चर्चा सुरू आहे.
टी20 वर्ल्डकप 2026 स्पर्धेतील उपांत्य फेरीच्या पहिल्या सामन्यात दक्षिण अफ्रिका आणि न्यूझीलंड हे संघ आमनेसामने येत आहेत. हा सामना 4 मार्च रोजी कोलकात्याच्या ईडन गार्डन्स मैदानावर होणार आहे. या सामन्यात विजय मिळवून अंतिम फेरी गाठण्याचा दोन्ही संघाचा मानस आहे. दक्षिण अफ्रिकेने या स्पर्धेत एकही सामना गमावलेला नाही. तर न्यूझीलंडचा संघ नशिबाच्या जोरावर उपांत्य फेरीपर्यंत पोहोचला आहे. नेट रनरेटचं गणित सोडवण्यात पाकिस्तानचा संघ अपयशी ठरला आणि उपांत्य फेरीचं तिकीट न्यूझीलंडला मिळालं. आता उपांत्य फेरीत दक्षिण अफ्रिका आणि न्यूझीलंड हे संघ भिडणार आहेत. टी20 वर्ल्डकप स्पर्धेचा इतिहास पाहिला तर दक्षिण अफ्रिकेचा संघ कायम न्यूझीलंडवर भारी पडला आहे. त्यात सध्याचा दक्षिण अफ्रिकेचा फॉर्म पाहता न्यूझीलंडसमोर कठीण आव्हान असणार आहे. या स्पर्धेच्या साखळी फेरीत दक्षिण अफ्रिकेने न्यूझीलंडचा धुव्वा उडवला होता.
अशी असू शकते दोन्ही संघांची प्लेइंग 11
दक्षिण आफ्रिका संभाव्य प्लेइंग 11 :क्विंटन डी कॉक, रायन रिकेल्टन, एडेन मार्करम, डेवाल्ड ब्रेव्हिस, डेव्हिड मिलर, ट्रिस्टन स्टब्स, मार्को यानसेन, कॉर्बिन बॉश, केशव महाराज, कागिसो रबाडा, लुंगी एनगिडी
न्यूझीलंड संभाव्य प्लेइंग 11 :फिन एलन, टिम सेफर्ट, रचिन रवींद्र, ग्लेन फिलिप्स, मार्क चॅपमन, डॅरिल मिशेल, मिशेल सँटनर, जेम्स नीशम, जेकब डफी, लॉकी फर्ग्युसन, ईश सोढी
काय झालं होतं साखळी फेरीच्या सामन्यात
न्यूझीलंड आणि दक्षिण अफ्रिका हे संघ साखळी फेरीत आमनेसामने आले होते. या सामन्यात नाणेफेकीचा कौल दक्षिण अफ्रिकेच्या बाजूने लागला आणि प्रथम गोलंदाजी स्वीकारली. न्यूझीलंडने 20 षटकात 7 गडी गमवून 175 धावा केल्या. तसेच विजयासाठी 176 धावांचं आव्हान दिलं. हे आव्हान दक्षिण अफ्रिकेने 3 गडी गमवून 17.1 षटकात पूर्ण केलं. या सामन्यात मार्को यानसेन सामनावीर ठरला होता. त्याने 4 षटकात 40 धावा देत 4 गडी बाद केले होते. याच सामन्यात धावांचा पाठलाग करताना कर्णधार एडन मार्करम याने नाबाद 86 धावांची खेळी केली होती. त्याने 44 चेंडूंचा सामना केला आणि 8 चौकार आणि 4 षटकार मारले होते.
