मुंबई: सनरायजर्स हैदराबादच्या (SRH) उमरान मलिकने (Umran Malik) आज भेदक गोलंदाजीचं दर्शन घडवलं. त्याने प्रतितास 150 किमीपेक्षा जास्त वेगाने गोलंदाजी केली. उमरान मलिक मूळचा जम्मू-काश्मीरचा आहे. यंदाच्या सीजनमध्ये आपल्या वेगवान गोलंदाजीने त्याने अनेक दिग्गजांना प्रभावित केलं आहे. या कामगिरीच्या बळावरच सनरायजर्स हैदराबादने या युवा प्रतिभावान वेगवान गोलंदाजाला रिटेन केलं होतं. मागच्या दोन सामन्यात उमरानने आपल्या प्रदर्शनाने एक्सपर्ट त्याला भारतीय क्रिकेटचं भविष्य का म्हणतायत? ते दाखवून दिलं. आज सनरायजर्स हैदराबाद आणि पंजाब किंग्समध्ये (SRH vs PBKS) आयपीएलचा 28 वा सामना खेळला जातोय. या मॅचमध्ये उमरानने मेडन ओव्हर टाकली. म्हणजे एकही रन्स दिला नाही. उमरानने 20 व्या षटकात मेडन ओव्हर टाकली. आयपीएल स्पर्धेत डेथ ओव्हर्समध्ये मेडन ओव्हर टाकणं, खूप मोठी गोष्ट आहे.
अनेक दिग्गज गोलंदाज चेंडू नवीन असताना, निर्धाव षटक टाकतात. सध्या सुरु असलेल्या आयपीएलचा ट्रेंड बघितला, तर 15 ते 20 षटकात गोलंदाजाला कुटलं जातं. खोऱ्याने धावा वसूल केल्या जातात. पहिल्या तीन ओव्हर चांगल्या टाकणाऱ्या बॉलरची सरासरी शेवटच्या षटकात खराब होते. उमरानने मलिकने आज या उलट केलं. त्याने शेवटची ओव्हर मेडन टाकली. महत्त्वाचं म्हणजे त्याने नुसतं निर्धाव षटक टाकलं नाही, तर त्याने चार विकेटही या ओव्हरमध्ये काढल्या.
W 0 W 0 W W W(RUN-OUT) – Umran Malik pic.twitter.com/t876zm3Otp
— Big Cric Fan (@cric_big_fan) April 17, 2022
मलिकने तीन विकेट स्वत: काढल्या. ओडियन स्मिथ, राहुल चहर आणि वैभव अरोरा यांच्या विकेट त्याने काढल्या. शेवटच्या चेंडूवर अर्शदीप रनआऊट झाला. 20 व्या षटकाच्या दुसऱ्याच चेंडूवर त्याने ओडियन स्मिथचा आपल्या गोलंदाजीवर झेल घेतला. त्यानंतर त्याने राहुल चाहर आणि वैभव अरोराला क्लीन बोल्ड केलं. त्यांना भोपळाही फोडू दिला नाही. अर्शदीप सिंहने त्याला हॅट्ट्रिक पूर्ण करु दिली नाही. मलिकने पंजाब किंग्सच्या फलंदाजांना खेळपट्टीवर स्थिरावू दिले नाही. उमरान मलिकने आज चार षटकात 28 धावा देत चार विकेट घेतल्या.