Mumbai : मुख्यमंत्री फडणवीस, उद्धव आणि राज ठाकरे आज एकाच मंचावर येणार? चर्चांना उधाण

महाराष्ट्राच्या राजकारणात सध्या अनेक घडामोडी सुरू असताना, एक लक्षवेधी कार्यक्रम आज मुंबईत पार पडणार आहे. सांस्कृतिक आणि राजकीय वर्तुळात उत्सुकता निर्माण करणारा हा कार्यक्रम म्हणजे महाराष्ट्राच्या हास्यरेषा या पुस्तकाचे प्रकाशन. या सोहळ्याच्या निमित्ताने राज्याच्या राजकारणातील दोन प्रमुख गट आणि एकाच कुटुंबातील राजकीय वारसदार एकत्र येण्याची शक्यता आहे.

मुख्यमंत्री देवेंद्र फडणवीस, शिवसेना (उद्धव बाळासाहेब ठाकरे) पक्षप्रमुख उद्धव ठाकरे आणि महाराष्ट्र नवनिर्माण सेनेचे अध्यक्ष राज ठाकरे हे तिघेही आज एकाच मंचावर एकत्र येण्याची शक्यता वर्तवली जात आहे. दादर येथील स्वातंत्र्यवीर सावरकर स्मारक सभागृहात या कार्यक्रमाचे आयोजन करण्यात आले आहे. सांस्कृतिक कार्यमंत्री आशिष शेलार यांची देखील या कार्यक्रमाला प्रमुख उपस्थिती असणार आहे.

फडणवीस आणि ठाकरे बंधू एकाच व्यासपीठावर येण्याची शक्यता ही सध्या राजकीय वर्तुळात चर्चेचा विषय ठरली आहे. अशा प्रकारे एका कार्यक्रमासाठी एकत्र येणे, हा महाराष्ट्राच्या राजकारणातील एक दुर्मिळ प्रसंग मानला जात आहे. या पुस्तक प्रकाशन सोहळ्याकडे सर्वांचे लक्ष लागले आहे की, हे तिन्ही महत्त्वाचे नेते आज प्रत्यक्षात एकत्र येऊन कोणता संदेश देतात.