Ishan Kishan : मी माझी बहीण गमावली पण…कातरलेल्या आवाजात बोलत ईशान किशन झाला भावुक

इंडियन प्रीमियर लीगमध्ये चेन्नई सुपर किंग्जविरुद्ध (CSK) खेळण्यात आलेल्या अटीतटीच्या सामन्यात सनरायझर्स हैदराबादने (SRH) दणदणीत विजय मिळवला. हैदराबादच्या या विजयाचा खरा शिल्पकार ठरला तो म्हणजे यष्टीरक्षक-फलंदाज इशान किशन. त्याने केलेल्या वादळी आणि समजूतदार फलंदाजीच्या जोरावर संघाने विजयाला गवसणी घातली. या उत्कृष्ट कामगिरीसाठी त्याला ‘प्लेअर ऑफ द मॅच’ पुरस्काराने सन्मानित करण्यात आले. मात्र, हा पुरस्कार स्वीकारल्यानंतर बोलताना इशान किशन प्रचंड भावुक झाला आणि त्याने हा विजय आपल्या कुटुंबाला समर्पित केला.

‘चेन्नईची खेळपट्टी फलंदाजीसाठी सोपी नव्हती’

सामन्यानंतर आपल्या खेळीबद्दल बोलताना इशान म्हणाला की, “जेव्हा मी पहिल्या डावात विकेटकीपिंग करत होतो, तेव्हाच मला खेळपट्टीचा अंदाज आला होता. हे पीच फलंदाजीसाठी अजिबात सोपं नाहीये हे मला समजलं होतं. खेळपट्टीचे बदलणारे स्वरूप पाहता, या धावांचा पाठलाग करणे (रनचेस) आमच्यासाठी खूप मोठे आव्हान असणार आहे याची मला पूर्ण कल्पना आली होती.”

Played for something much bigger than just the game tonight 🧡

A deeply special knock for a very special reason 🥺#TATAIPL | #KhelBindaas | #CSKvSRH | @SunRisers | @ishankishan51 pic.twitter.com/njHDlnArUX

— IndianPremierLeague (@IPL) May 18, 2026

तो पुढे म्हणाला, “मैदानात डाव्या हाताचा फलंदाज (लेफ्टी बॅटर) असल्याचा फायदा मला मिळाला. अशा वेळी गोलंदाजांना त्यांची लाईन आणि लेंथ नियंत्रित ठेवणे कठीण जाते. मी कोणतीही घाई न करता प्रत्येक ओव्हर खेळून काढण्याचा आणि सामना अगदी शेवटच्या ओव्हरपर्यंत घेऊन जाण्याचा विचार केला होता, ज्यामध्ये मी यशस्वी ठरलो.”

कठीण प्रसंगात देवाची साथ आणि सकारात्मक ऊर्जा

आपल्या आत्मविश्वासाविषयी बोलताना इशानने देवाचे आभार मानले. “आज मैदानात उतरल्यावर मला देवाचा आशीर्वाद पाठीशी असल्यासारखं वाटत होतं. माझ्या मनात एक वेगळीच सकारात्मक ऊर्जा आणि कमालीचा आत्मविश्वास निर्माण झाला होता, ज्यामुळे मी संघाला विजय मिळवून देऊ शकलो. सर्वात महत्त्वाचं म्हणजे या विजयामुळे आम्ही आता स्पर्धेत क्वालिफाय झालो आहोत,” असा आनंदही त्याने व्यक्त केला.

चुलत बहिणीच्या निधनाचे दुःख

या मुलाखतीदरम्यान इशान किशन आपल्या कुटुंबाचा उल्लेख करताना भावुक झाला. मैदानात उपस्थित असलेल्या आपल्या चुलत भावाकडे बोट दाखवत तो म्हणाला, “कधीकधी खेळात प्रेरणा खूप महत्त्वाची असते. माझा चुलत भाऊ तिथे स्टँड्समध्ये उभा आहे. त्याने नुकतीच आपल्या सख्ख्या बहिणीला गमावले आहे. तो काळ आमच्या संपूर्ण कुटुंबासाठी अत्यंत कठीण आणि वेदनादायी होता.”

“माझे चुलत भाऊ-बहीण पहिल्यांदाच माझा सामना पाहण्यासाठी स्टेडियममध्ये आले होते. त्यामुळे केवळ आणि केवळ त्यांच्यासाठीच मला हा सामना कोणत्याही परिस्थितीत जिंकून द्यायचा होता. मी हा महत्त्वाचा विजय माझ्या त्या चुलत भावाला आणि कुटुंबाला डेडीकेट (समर्पित) करतो.”

प्लेऑफसाठी कसली कंबर

सामन्याचा समारोप करताना इशानने आगामी आव्हानांवरही भाष्य केले. तो म्हणाला, “माझ्या कुटुंबाला हा विजय पाहून नक्कीच थोडा आनंद मिळाला असेल. अशा कठीण परिस्थितीत मैदानावर टिकून राहून संघाला विजय मिळवून देण्याचा आनंद काही वेगळाच असतो. पण आता आमचे लक्ष्य पुढे आहे, आम्हाला प्लेऑफमध्येही अशीच दमदार कामगिरी करावी लागेल.”