मुलासोबत दफन केलं स्वर्गाचं तिकीट, 1750 वर्ष जुनं रहस्य; अपार्टमेंटचं खोदकाम करताच…

बुलगारियामध्ये काळ्या समुद्राच्या जवळ आर्कियोलॉजिस्टसना रोमन काळातील एका मुलाची कबर सापडली आहे. स्टारा जागरा शहरात एका नव्या अपार्टमेंट आणि पार्किंग प्रोजेक्टच्या सर्व्हेच्या दरम्यान ही कबर सापडली. या कबरीत कानातील सोन्याची सुंदर डुलं आणि एक छोटं ब्रॉन्जचं नाणंही सापडलं. या दुर्लभ नाण्याला अंटोनिनियानस म्हटलं जातं. हे नाणं 274 वा 275 ईसवी सनाच्या आसपासचं असण्याची शक्यता संशोधनातून वर्तवली गेली आहे. प्राचीन रोम आणि ग्रीक मान्यतेनुसार, मृत्यूनंतर आत्म्याला नदी पार करणाऱ्या नावाड्याला भाडं द्यावं लागायचं. त्यामुळेच शोकाकूल कुटुंबाने मुलाचा स्वर्गाचा प्रवास सोपा व्हावा म्हणून तिकीट म्हणून हे नाणं कबरीत ठेवलं होतं.

प्राचीन ग्रीक आणि रोमन परंपरांमद्ये मृत्यूनंतरच्या जीवनाबाबत खास परंपरेला मान्यता दिली होती. या मान्यतेनुसार, आत्मा स्वर्गात जाण्यासाठी कॅरन नावाचा नावाडी एक पौराणिक नदी पार करून द्यायचा. ही नदी पार करण्याच्या बदल्यात नावाड्याला शुल्क द्यावे लागायचे. संशोधकांच्या मते, कबरीतील मुलाजवळचं हे ब्रॉन्जचं नाणं त्या नावाड्याला भाडं म्हणून देण्यासाठी कबरीत ठेवलं असावं. दु:खी कुटुंबाने मुलाच्या सुरक्षितप्रवासासाठी कबरीत नाणं ठेवलं होतं, हा त्याचाच पुरावा आहे, असंही संशोधकांचं म्हणणं आहे.

135 सांगाडे सापडले

स्टारा जागरामध्ये जमिनीखाली एक मोठं कब्रस्तान सापडलं आहे. शहराच्या जुन्या भिंतीच्या बाहेर हे कब्रस्तान सापडलंय. या कब्रस्तानाचा वापर तब्बल तीन शतके केला जायचा. या ठिकाणी खोदण्यात आलेल्या 135 कबरींपैकी या मुलाची कबर वेगळीच होती. या मुलाची कबर सजवलेली होती. त्याच्यासोबत सोन्याची डुलं आणि थ्रेसचं ब्रॉन्जचं नाणं होतं. मात्र, या मुलाचं वय आणि मृत्यूचं कारण स्पष्ट होऊ शकलं नाही. नाण्यावरील तारखेमुळे या मुलाचा मृत्यू 274 वा 275 ईसवी सनाच्या आसपास झाला असावा असं सांगितलं जातं.

कनेक्शन काय?

रोमन साम्राज्य आपल्या भरभराटीच्या काळात 19 लाख वर्ग मैलापेक्षा अधिक परिसरात फैलावलेलं होतं. रोमने 46 ईसवी सनाच्या वेळी थ्रेस परिसरावर ताबा मिळवला होता. त्यानंतर सम्राट ट्राजन यांची आठवण म्हणून स्टारा जागराचं नाव बदलून उल्पिया ऑगस्टा ट्रायना ठेवण्यात आलं. हे शहर थ्रेसचं एक प्रमुख केंद्र बनलं होतं. दुसऱ्या आणि तिसऱ्या शतकामध्ये या शहराला स्वत:ची करन्सी निर्माण करण्याची परवानगी मिळाली होती. सुमारे 1750 वर्षानंतर याच ऐतिहासिक शहरातील एका आवशेषातून हा दुर्मीळ शोध लागला आहे.