सर्वात मोठा ब्लॉकबस्टर देणारा दिग्दर्शक, पण झाला अहंकारी, जाणूनबुजून बनवले 26 फ्लॉप चित्रपट

Ram Gopal Varma : बॉलिवूडमध्ये असे काही दिग्दर्शक आहेत ज्यांच्या चित्रपटांमुळे त्यांना प्रचंड लोकप्रियता मिळाली. पण त्यांनी कधी मनात अहंकार येऊ दिला नाही. पण इंडस्ट्रीमध्ये असा एक दिग्दर्शक आहे, ज्याने सर्वात मोठा ब्लॉकबस्टर चित्रपट दिला. पण त्याच्या मनात इतका अहंकार आला की त्याने जाणूनबुजून तब्बल 26 फ्लॉप चित्रपट बनवले.

धाडसी सिनेमासाठी ओळखले जाणारे दिग्दर्शक राम गोपाल वर्मा यांनी अलीकडेच आपल्या करिअरबाबत मोठा खुलासा केला आहे. त्यांनी सांगितले की, त्यांच्या काही चुकीच्या निर्णयांमुळे आणि वाढलेल्या अहंकारामुळे त्यांच्या करिअरला मोठा फटका बसला. आपल्या अनेक चित्रपटांच्या अपयशासाठी त्यांनी स्वतःलाच जबाबदार धरले आहे.

‘सत्या’नंतर दिशाभूल झाली

‘सत्या’ या सुपरहिट चित्रपटानंतर आपण योग्य दिशेपासून भरकटलो असे वर्मा यांनी सांगितले. या चित्रपटात त्यांनी अंडरवर्ल्डची खरी बाजू दाखवण्याचा प्रयत्न केला होता. सामान्य लोकांना गुन्हेगारी जगताबद्दल फक्त गोळीबार, खून किंवा पोलिस एन्काऊंटर यांच्याच बातम्या ऐकायला मिळतात. मात्र ‘सत्या’मध्ये त्यांनी गँगस्टर्सचे वैयक्तिक आयुष्य, त्यांचे नातेसंबंध आणि भावना दाखवल्या. त्यामुळेच हा चित्रपट प्रेक्षकांच्या मनात घर करून गेला.

मात्र या चित्रपटानंतर काहीतरी मोठे आणि वेगळे करायला हवे होते. ते न केल्यामागे आपला अहंकार आणि निष्काळजीपणा कारणीभूत होता असे त्यांनी स्पष्ट केले. राम गोपाल वर्मा यांनी प्रामाणिकपणे सांगितले की त्यांच्या अनेक हिट चित्रपटांचा यशस्वी होणे हा कोणत्याही ठोस प्लॅनचा भाग नव्हता. जर त्यांना हिट चित्रपट बनवण्याचा ठराविक फॉर्म्युला माहिती असता तर त्यांनी कधीही फ्लॉप चित्रपट बनवले नसते. मी फक्त चित्रपट बनवतो. तो हिट होईल की फ्लॉप हे माझ्या हातात नसते असे त्यांनी स्पष्ट केले.

‘ही माझी सर्वात मोठी चूक’

आपल्या करिअरमधील सर्वात वाईट चित्रपटाबद्दल विचारले असता वर्मा यांनी ‘आग’ या चित्रपटाचे नाव घेतले. हा चित्रपट बनवण्यासाठी सर्वाधिक वेळ आणि पैसा खर्च झाला पण तो पूर्णपणे अपयशी ठरला. त्यानंतर त्यांनी डिपार्टमेंट या चित्रपटाचाही उल्लेख केला.

महत्त्वाचे म्हणजे, आपल्या संपूर्ण करिअरमध्ये राम गोपाल वर्मा यांनी एकूण 36 चित्रपट दिग्दर्शित केले असून त्यापैकी तब्बल 26 चित्रपट बॉक्स ऑफिसवर फ्लॉप ठरले आहेत. तरीही भारतीय चित्रपटसृष्टीत त्यांची एक वेगळी ओळख कायम आहे.