Ajit Pawar Final Ritual : अजित पवार पंचतत्वात विलीन, दोन्ही मुलांकडून मुखाग्नी

उपमुख्यमंत्री अजित पवारांवर बारामती येथे शासकीय इतमामात अंत्यसंस्कार करण्यात आले. या दुर्दैवी घटनेने महाराष्ट्रावर शोककळा पसरली आहे. बारामती येथील विद्या प्रतिष्ठानच्या प्रांगणात त्यांच्या अंत्यदर्शनासाठी जनसागर उसळला होता. हजारो कार्यकर्ते आणि नागरिकांनी आपल्या लाडक्या नेत्याला अखेरचा निरोप देण्यासाठी गर्दी केली होती. त्यांच्या निधनाने राज्याच्या राजकारणात मोठी पोकळी निर्माण झाली आहे.

यावेळी कार्यकर्त्यांनी अजित दादा परत या, अजित दादा अमर रहे आणि महाराष्ट्राचा एकच वाघ, अजित दादा अशा घोषणांनी परिसर दणाणून सोडला. आपल्या नेत्याबद्दलची श्रद्धा आणि प्रेम या घोषणांमधून स्पष्टपणे दिसून येत होते. अजित पवारांना शासकीय इतमामात निरोप देण्यात आला. यावेळी बंदुकीची तीन वेळा सलामी देऊन त्यांना मानवंदना देण्यात आली. उपस्थित प्रत्येकाने शांततेत उभं राहून आपल्या नेत्याला ही अखेरची सलामी दिली. हा क्षण अत्यंत भावूक करणारा होता, जिथे प्रत्येकाच्या डोळ्यात अश्रू तरळले होते आणि एकच दादा, अजित दादा या घोषणांनी वातावरण भारले होते.