राष्ट्रवादीच्या 20-25 आमदारांनी घेतली सुनेत्रा पवारांची भेट; मोठं कारण आलं समोर

अजित पवारांच्या विमान अपघातावरून निर्माण झालेल्या संशयाच्या पार्श्वभूमीवर 20 ते 25 आमदारांनी देवगिरी बंगल्यावर उपमुख्यमंत्री सुनेत्रा पवारांची भेट घेतली. सुनील तटकरेंच्या अनुपस्थितीत पार पडलेल्या या भेटीत आमदारांनी अपघाताच्या प्राथमिक अहवालावर प्रश्नचिन्ह उपस्थित केले. सुनेत्रा पवारांनी आमदारांना सांगितले की त्या पार्थ पवारांसोबत पंतप्रधान नरेंद्र मोदींची भेट घेणार आहेत. या भेटीदरम्यान, अपघाताची योग्य आणि पारदर्शक चौकशी व्हावी अशी मागणी पंतप्रधान मोदींकडे केली जाईल.

या बैठकीत, आमदारांनी अपघाताच्या अहवालावरून शंका घेतल्याची माहिती आहे. काही दिवसांपूर्वी सुनेत्रा पवारांनी मुख्यमंत्री देवेंद्र फडणवीस यांना सीबीआय चौकशीची मागणी करणारे पत्र दिले होते, परंतु अद्याप कोणतीही चौकशी सुरू न झाल्याबद्दलही आमदारांनी विचारणा केली. अपघातानंतर सापडलेल्या दादांच्या वस्तू (चप्पल, घड्याळ, मोबाईल, बॅग) पाहून आमदार भावनाविवश झाले. अजित पवारांच्या कुटुंबीयांच्या मते रोहित पवारांची चौकशीची भूमिका योग्य आहे.