Viral Video : बँकेत कर्मचारी केक कापण्यात व्यस्त, शेतकरी मात्र…; बुलडाण्यातील व्हिडिओ व्हायरल

बुलडाणा जिल्ह्यातील शेगाव येथील इंडियन ओव्हरसीज बँकेत एक धक्कादायक घटना समोर आली आहे. बँकेच्या कार्यालयीन वेळेतच कर्मचाऱ्यांकडून वाढदिवसाचे सेलिब्रेशन सुरू होते, तर दुसरीकडे बँकेच्या कामासाठी आलेल्या शेतकऱ्यांची लांब रांग लागली होती. वाढदिवस साजरा करत असलेल्या बँक कर्मचाऱ्यांना बाहेर रांगेत उभे असलेल्या शेतकऱ्यांच्या अडचणींची कुठलीही पर्वा नसल्याचा आरोप केला जात आहे. या घटनेचा व्हिडिओ सध्या सोशल मीडियावर मोठ्या प्रमाणात व्हायरल होत आहे.

व्हायरल झालेल्या व्हिडिओमध्ये बँकेतील कर्मचारी गाणी लावून, केक कापत वाढदिवस साजरा करताना दिसत आहेत. याचवेळी अनेक शेतकरी बँकेच्या बाहेर किंवा आतमध्ये आपल्या कामासाठी वाट पाहत उभे असल्याचे स्पष्टपणे दिसते. सध्या बुलडाणा जिल्ह्यात दुष्काळाची परिस्थिती असताना, शेतकऱ्यांना अनेक आर्थिक अडचणींचा सामना करावा लागत आहे. अशा परिस्थितीत त्यांना बँकेकडून त्वरित मदतीची अपेक्षा असते. मात्र, बँक कर्मचाऱ्यांचे हे बेजबाबदार वर्तन पाहून शेतकऱ्यांमध्ये तीव्र संताप व्यक्त होत आहे.

बँकेच्या कामकाजाच्या वेळेत अशा प्रकारे वैयक्तिक कार्यक्रम साजरे करणे हे पूर्णपणे अयोग्य असून, यामुळे शेतकऱ्यांचा वेळ वाया जातो आणि त्यांच्या मनात रोष निर्माण होतो. बँक कर्मचाऱ्यांना शेतकऱ्यांच्या समस्यांशी काहीही देणेघेणे नसल्याचे या घटनेतून स्पष्ट होत असल्याचा आरोप स्थानिकांनी केला आहे. या घटनेची दखल घेऊन संबंधित कर्मचाऱ्यांवर योग्य ती कारवाई करण्याची मागणी आता जोर धरू लागली आहे.