Devendra Fadnavis : दुष्काळी बैठकीला येत नसाल तर…; देवेंद्र फडणवीस अधिकाऱ्यांवर संतापले, थेट म्हणाले…

मुख्यमंत्री देवेंद्र फडणवीस यांनी दुष्काळी आढावा बैठकींना दांडी मारणाऱ्या अधिकाऱ्यांवर तीव्र संताप व्यक्त केला आहे. बैठकीला अनुपस्थित राहणाऱ्या अधिकाऱ्यांना निलंबित करण्याची थेट चेतावणी त्यांनी दिली. काही मंत्र्यांनी फडणवीस यांच्याकडे तक्रार केली होती की, आचारसंहितेच्या नावाखाली काही अधिकारी दुष्काळी बैठकांना येत नाहीत. या तक्रारीनंतर फडणवीस चांगलेच संतापले.

फडणवीस म्हणाले, “दुष्काळाच्या बैठकीला आचारसंहितेचे कारण सांगून न येणाऱ्या अधिकाऱ्यांची नावे मला द्या. त्या सर्वांना निलंबित करून टाकेन.” त्यांनी स्पष्ट केले की, दुष्काळाच्या उपाययोजनांसाठी आचारसंहिता लागू होत नाही आणि मंत्र्यांनी आपले अधिकार वापरून कामे करावीत. दुष्काळासंदर्भातील बैठकांसाठी निवडणूक आयोगाच्या परवानगीची गरज नसते, त्यामुळे परवानगी घेण्याच्या भानगडीतही पडू नका, असे निर्देश त्यांनी दिले.

दुष्काळ संबंधित कॅबिनेट सब-कमिटीच्या बैठकीत या विषयावर चर्चा झाली. कुठलेही इलेक्शन कमिशन किंवा आचारसंहिता दुष्काळात अशा प्रकारची बंधने आणू शकत नाही. काही अधिकारी जाणीवपूर्वक बैठका घेत नसल्याने दुष्काळाच्या उपाययोजना लागू होत नाहीत, अशी तक्रार होती. त्यामुळे दुष्काळी उपाययोजना करत असताना कुठलीही आचारसंहिता आड येऊ शकत नाही, यावर फडणवीस यांनी भर दिला.