114 राफेलसह हॅमर मिसाईल्स खरेदीवर शिक्कामोर्तब!

भारत आणि फ्रान्स दरम्यान राफेल विमाने आणि हॅमर मिसाईलच्या खरेदीसंदर्भात एक अत्यंत महत्त्वाचा करार नुकताच संपन्न झाला आहे. मुंबई दौऱ्यावर असताना फ्रान्सचे राष्ट्राध्यक्ष इमॅन्युएल मॅक्रॉन आणि भारताचे पंतप्रधान नरेंद्र मोदी यांच्या बैठकीत या मोठ्या संरक्षण करारावर शिक्कामोर्तब करण्यात आले.

या करारानुसार, भारत फ्रान्सकडून तब्बल 114 राफेल विमाने आणि हॅमर मिसाईलची खरेदी करणार आहे. हा प्रकल्प अंदाजे 3.25 लाख कोटी रुपयांचा असून, भारताच्या इतिहासातील हा आतापर्यंतचा सर्वात मोठा लष्करी करार मानला जात आहे. या भागीदारीमुळे दोन्ही देशांमधील धोरणात्मक संबंधांना एक नवीन आयाम मिळाला आहे. पंतप्रधान मोदी यांनी ‘स्ट्रॅटेजिक पार्टनरशिपला अभूतपूर्व खोली आणि ऊर्जा दिली आहे’ असे म्हटले आहे.

या करारातील सर्वात महत्त्वाचा पैलू म्हणजे, यापुढे राफेल विमानांचे उत्पादन भारतातच केले जाईल, ज्यामुळे देशांतर्गत संरक्षण उत्पादनाला चालना मिळेल. खरेदी करण्यात येणाऱ्या राफेल विमानांमध्ये 24 सुपर राफेल F5 आवृत्तीची विमाने समाविष्ट आहेत. सध्या भारतीय हवाई दलाकडे F3 प्रकारची राफेल विमाने आहेत, परंतु नव्या करारानुसार भारतीय वायुदलाच्या ताफ्यात F4 आवृत्तीची प्रगत राफेल विमाने दाखल होतील, ज्यामुळे हवाई दलाची ताकद लक्षणीय वाढेल.