मला महिला आयोगाची अध्यक्ष करा मग… गिरीजा राऊत प्रकरणी बोलताना करुणा मुंडे हे काय बोलून गेल्या?

विनायक राऊत आणि त्यांचे पुत्र गितेश राऊत यांच्याविरोधात गिरीजा राऊत यांनी केलेल्या आरोपांमुळे हे प्रकरण चर्चेत आले आहे. गिरीजा राऊत या विनायक राऊत यांच्या सून असून, त्यांनी कुटुंबाकडून मानसिक छळ झाल्याचा आरोप केला आहे. मात्र विनायक राऊत यांनी हे सर्व आरोप फेटाळून लावत यामागे षडयंत्र असल्याचा दावा केला आहे.

या प्रकरणावर आता करुणा मुंडे यांनी पहिली प्रतिक्रिया दिली आहे. महिलांच्या तक्रारींना न्याय मिळण्यासाठी राज्य महिला आयोगाचे अध्यक्षपद तातडीने भरले जावे, अशी मागणी त्यांनी केली आहे. तसेच गरज पडल्यास मला महिला आयोगाचे अध्यक्ष करा, मग महिलांना कसा न्याय मिळवून देता येतो ते दाखवते, असेही त्या म्हणाल्या.

करुणा मुंडे यांनी अनेक लोकप्रतिनिधी अंधश्रद्धेच्या प्रभावाखाली असल्याचाही दावा केला. अनेक नेत्यांचे भोंदू बाबांशी संबंध असल्याचे त्यांनी म्हटले आहे. तसेच त्या लवकरच गिरीजा राऊत यांची भेट घेणार असल्याचेही त्यांनी सांगितले. राज्यातील सध्याच्या राजकीय घडामोडींवरही त्यांनी सरकारवर टीका केली.