Ratnagiri Ganeshotsav | हिरव्यागार भातशेतीतून लाडक्या बाप्पाचं कोकणात आगमन, मनोरम दृश्य

कोकणात गणेशोत्सवाचा उत्साह सध्या शिगेला पोहोचलेला आहे. हिरव्यागार भातशेतातून डोक्यावर गणपतीच्या मूर्ती विराजमान करून आणण्याची अनोखी परंपरा आजही कोकणात कायम आहे. श्रद्धेचा हा अनोखा प्रवास केवळ कोकणातच अनुभवता येतो. कित्येक वर्षांपासून चालत आलेल्या या परंपरेनुसार, ग्रामस्थ आपल्या लाडक्या गणरायाला डोक्यावरून आणतात. ढोल-ताशांचा गजर, आनंद आणि उत्साहाचे वातावरण अशा परिस्थितीत गणेशमूर्तींचे आगमन होते.

सध्या भातशेतीचा हंगाम असल्यामुळे भाताची शेतं हिरवीगार झाली आहेत, ज्यामुळे हा देखावा आणखी विलोभनीय दिसतो. कर्जवे गावातील ग्रामस्थ आपले लाडके दैवत गणपतीला डोक्यावरून आणताना हे चित्र डोळ्यांचे पारणे फेडणारे आहे. सुबक आणि देखण्या शाडूमातीच्या गणेशमूर्ती डोक्यावर घेऊन येण्याची ही पद्धत कोकणातील गणेशोत्सवाचे एक महत्त्वाचे वैशिष्ट्य आहे. काही वेळातच गणपती बाप्पा प्रत्येक कोकणातील घरात विराजमान होतील आणि त्यांची विधिवत पूजा केली जाईल.