Latur Drought : घोषणा नको, शेतकऱ्यांच्या खात्यात पैसे द्या; छावा संघटनेचं आमरण उपोषण

मराठवाड्यासह संपूर्ण राज्यात दुष्काळ जाहीर करावा आणि शेतकऱ्यांना तातडीने आर्थिक मदत द्यावी, या प्रमुख मागणीसाठी अखिल भारतीय छावा संघटनेने लातूर जिल्ह्यातील तावशी येथे आमरण उपोषण सुरू केले आहे. आज या उपोषणाचा पाचवा दिवस असून, संघटनेचे प्रदेशाध्यक्ष विजयकुमार घाडगे पाटील यांच्या नेतृत्वाखाली हे आंदोलन सुरू आहे.

पावसाअभावी आणि दुष्काळजन्य परिस्थितीमुळे मराठवाडा तसेच लातूर जिल्ह्यातील शेतकरी पूर्णपणे खचले आहेत. त्यांच्या खरीपाच्या पिकांचे मोठे नुकसान झाले आहे. सरकारने शेतकऱ्यांच्या पाठीशी उभे राहावे, अशी मागणी उपोषणकर्त्यांनी केली आहे. मुख्यमंत्री या उपोषण स्थळाजवळून गेले, मात्र त्यांनी आंदोलनाची दखल घेतली नाही, असा आरोप छावा संघटनेने केला आहे. गणपती विसर्जनानंतर हे आंदोलन आणखी तीव्र करण्याचा इशारा संघटनेने दिला आहे.

या आंदोलनातून शेतकऱ्यांसाठी प्रति हेक्टरी 1 लाख रुपये नुकसान भरपाई, नियमित कर्ज फेडणाऱ्या शेतकऱ्यांना 1 लाख रुपये प्रोत्साहनपर मदत, चारा छावण्यांची उभारणी आणि विद्यार्थ्यांची फी माफी यांसारख्या मागण्या करण्यात येत आहेत. शासनाने केवळ घोषणा न करता, तातडीने कार्यवाही करावी अशी अपेक्षा उपोषणकर्त्यांनी व्यक्त केली आहे.