Latur : फायनान्स कंपन्यांची खुलेआम गुंडागर्दी; 22 हजारांचा हफ्ता चुकला, वसुलीसाठी शेतकऱ्याला शिवीगाळ
लातूरमध्ये फायनान्स कंपन्यांच्या गुंडगिरीचा प्रकार समोर आला आहे. २२ हजार रुपयांचा हफ्ता थकल्याने एका महिला वसुली एजंटने शेतकऱ्याला व त्याच्या कुटुंबीयांना अश्लील भाषेत शिवीगाळ केली. या घटनेची ऑडिओ क्लिप व्हायरल झाली असून, प्रशासनाने संबंधितांवर तातडीने कारवाई करण्याची मागणी होत आहे.
लातूर जिल्ह्यात फायनान्स कंपन्यांकडून सुरू असलेल्या खुलेआम गुंडगिरीचा धक्कादायक प्रकार उघडकीस आला आहे. सरकारच्या आदेशांना हरताळ फासत वसुली एजंट्सकडून अश्लील भाषेचा वापर केला जात आहे. खलंगरी गावातील एका शेतकऱ्याला २२ हजार रुपयांचा हफ्ता चुकल्याने महिला रिकव्हरी एजंटने फोनवरून शिवीगाळ केल्याची ऑडिओ क्लिप सध्या सोशल मीडियावर मोठ्या प्रमाणावर व्हायरल होत आहे.
या ऑडिओ क्लिपमध्ये संबंधित एजंट शेतकऱ्याच्या पत्नी आणि लेकीवरून शिव्या देताना ऐकू येत आहे. सतीश बोळंगे नावाच्या शेतकऱ्याने फायनान्स कंपनीकडून दोन लाखांचे कर्ज घेतले होते आणि त्याचा भाऊ जामीनदार होता. हप्ता थकल्याने एजंटने जामीनदार असलेल्या भावाला फोन करून ही अपमानास्पद भाषा वापरली.
शेतकरी संघटनेच्या एका जिल्हाध्यक्षांनी या प्रकारावर तीव्र संताप व्यक्त केला आहे. अशा महिला वसुली एजंटवर तात्काळ फौजदारी गुन्हा दाखल करून फायनान्स कंपनीचे कार्यालय सील करण्याची मागणी त्यांनी केली आहे. मायक्रो फायनान्स कंपन्यांकडून अशा पद्धतीने कर्ज वसुली सुरू असल्याबद्दल चिंता व्यक्त होत आहे, आणि पीडित शेतकऱ्यांनी पोलिसांत तात्काळ गुन्हा दाखल करण्याचे आवाहन करण्यात आले आहे.
Published on: Nov 18, 2026 07:29 PM
फायनान्स कंपन्यांची खुलेआम गुंडागर्दी; 22 हजारांचा हफ्ता चुकला अन्....
सातारा जिल्हा बँकेत भाजपला बाजूला सारत राष्ट्रवादी-शिंदेसेनेची सत्ता!
मन शांत ठेवलं की मार्ग निघतो... बाळासाहेबांच्या एका शिकवणीचा उद्धव....
सांगली जिल्हा बँकेच्या सत्तेत नवं समीकरण; काँग्रेसचे महेंद्र लाड....

