MSRTC : एसटी कर्मचाऱ्यांना दिलासा, वेतनासाठी सरकारकडून मोठं पाऊल, आता नो टेन्शन! कारण…

महाराष्ट्र राज्य मार्ग परिवहन महामंडळ (एसटी) कर्मचाऱ्यांच्या वेतनासंदर्भात राज्य सरकारने एक महत्त्वाचा निर्णय घेतला आहे. एसटी कर्मचाऱ्यांच्या वेतनासाठी ४७१ कोटी रुपयांचा निधी मंजूर करण्यात आला आहे. यामुळे सप्टेंबर महिन्याचे वेतन न मिळाल्याने चिंतेत असलेल्या ८३ हजार कर्मचाऱ्यांचा वेतनाचा प्रश्न अखेर सुटलेला आहे. गृह विभागाने या निधीला मंजुरी दिली आहे.

सवलत मूल्याच्या प्रतिपूर्तीपोटी ही रक्कम एसटी महामंडळाला दिली जाणार आहे. याचा अर्थ, एसटी महामंडळाकडून प्रवाशांना दिल्या जाणाऱ्या विविध सवलतींसाठी येणारा खर्च राज्य सरकार उचलत आहे, ज्यामुळे महामंडळावरील आर्थिक भार कमी होऊन कर्मचाऱ्यांचे वेतन वेळेवर दिले जाण्याची व्यवस्था झाली आहे. या निर्णयामुळे महाराष्ट्रातील लाखो प्रवाशांना सेवा देणाऱ्या एसटी कर्मचाऱ्यांच्या आर्थिक स्थैर्याला मोठा आधार मिळाला आहे.