Vidhan Parishad Election | कोण कुणाविरुद्ध? विधान परिषद निवडणुकीतील सर्वात मोठ्या लढतींचं चित्र स्पष्ट

स्थानिक स्वराज्य संस्थांच्या विधान परिषद निवडणुकीसाठी राज्यातील 17 जागांवर राजकीय वातावरण चांगलेच तापले असून महायुती आणि महाविकास आघाडीमध्ये अनेक ठिकाणी थेट लढती रंगणार आहेत. प्रमुख मतदारसंघांतील उमेदवारांची नावे जवळपास निश्चित झाली असून निवडणुकीचे चित्र स्पष्ट होत आहे.
चंद्रपूर-वर्धा-गडचिरोली मतदारसंघात भाजपचे अरुण लखानी आणि काँग्रेसचे शैलेश अग्रवाल यांच्यात थेट सामना होणार आहे. भंडारा-गोंदिया मतदारसंघात भाजपचे अविनाश ब्राह्मणकर यांच्यासमोर काँग्रेसचे प्रफुल अग्रवाल आव्हान उभे करणार आहेत. तर अमरावतीमध्ये भाजपचे प्रवीण पोटे आणि काँग्रेसचे हर्षजीत देशमुख यांच्यात प्रतिष्ठेची लढत रंगणार आहे.
पश्चिम महाराष्ट्रातील सांगली-सातारा मतदारसंघात भाजपचे धैर्यशील कदम यांच्याविरोधात शरद पवार गटाचे बाळासाहेब पाटील मैदानात उतरले आहेत. सोलापूरमध्ये भाजपचे राजेंद्र राऊत आणि काँग्रेसचे फत्तेपूरकर यांच्यात मुकाबला होणार आहे. अहिल्यानगरमध्ये नुकतेच भाजपमध्ये प्रवेश केलेले प्राजक्त तनपुरे यांच्यासमोर शरद पवार गटाच्या राणी लंके यांचे आव्हान असणार आहे.
मराठवाड्यातील छत्रपती संभाजीनगर मतदारसंघात भाजपचे सुहास शिरसाट आणि शिवसेना (ठाकरे गट) यांच्या देवयानी डोणगावकर यांच्यात थेट लढत होणार आहे. तर नांदेडमध्ये भाजपचे अमर राजूरकर आणि काँग्रेसचे माधवराव जळगावकर आमनेसामने येणार आहेत. एकूणच, विधान परिषदेच्या 17 जागांसाठी होणाऱ्या या निवडणुकीत महायुती आणि महाविकास आघाडी यांच्यातील राजकीय संघर्ष अधिक तीव्र होणार असून अनेक मतदारसंघांमध्ये चुरशीच्या लढती पाहायला मिळण्याची शक्यता आहे.