Maharashtra Elections 2025 : महाराष्ट्रातील 24 नगरपालिकांमधील मतदानाला ब्रेक, उद्या नेमकं कुठं मतदान अन् कुठं स्थगिती?

महाराष्ट्र राज्यातील २४ नगरपालिका आणि नगरपंचायतींमधील नगराध्यक्षपदासाठीचे मतदान तसेच काही ठिकाणी नगरसेवक पदाच्या निवडणुका निवडणूक आयोगाने पुढे ढकलल्या आहेत. या निवडणुका आता २० डिसेंबर रोजी होणार असून, त्याचा निकाल २१ डिसेंबरला लागेल. निवडणूक आयोगाने दिलेल्या माहितीनुसार, उमेदवारांनी दाखल केलेल्या न्यायालयीन अपीलांवर उशिराने निकाल लागल्याने आणि उमेदवारी अर्ज मागे घेण्यासाठी पुरेसा कालावधी न मिळाल्याने ही स्थगिती देण्यात आली आहे. या निर्णयामुळे राजकीय वर्तुळात नाराजी व्यक्त होत आहे.

मुख्यमंत्र्यांनी निवडणूक आयोगावर कायद्याचा चुकीचा अर्थ लावल्याचा आरोप केला आहे. तर, विरोधी पक्षांनी यामागे सत्ताधाऱ्यांचा हात असल्याचा आणि प्रचारासाठी अधिक वेळ मिळावा यासाठी केलेली राजकीय खेळी असल्याचा आरोप केला आहे. अमरावती, छत्रपती संभाजीनगर, पुणे, नाशिक, कोकण आणि नागपूर या विभागांमध्येही नगरसेवक पदाच्या निवडणुका पुढे ढकलण्यात आल्या आहेत. उमेदवारांनी केलेल्या खर्चाचे काय, असा प्रश्नही या निमित्ताने उपस्थित होत आहे.