Shiv Sena Symbol Dispute : 3 वर्षांपासून सुनावणी… महापालिका निवडणुकांपूर्वी धनुष्यबाण कोणाच्या हाती? अंतिम फैसल्याची घडी

शिवसेना पक्ष आणि त्याच्या धनुष्यबाण या पक्षचिन्हावर गेल्या तीन वर्षांपासून सुरू असलेली कायदेशीर लढाई आता निर्णायक टप्प्यावर आली आहे. उद्या, सर्वोच्च न्यायालयात या प्रकरणाची अंतिम सुनावणी होणार आहे. या महत्त्वपूर्ण सुनावणीनंतर धनुष्यबाण चिन्ह उद्धव बाळासाहेब ठाकरे यांच्या गटाला परत मिळेल की एकनाथ शिंदे गटाच्या बाजूने निकाल लागेल, याबाबत उत्सुकता वाढली आहे.

विशेषतः, मुंबई महानगरपालिका निवडणुका तोंडावर असल्याने, सर्वोच्च न्यायालयाचा हा निर्णय महाराष्ट्राच्या राजकारणावर मोठा परिणाम करणारा ठरू शकतो. उद्धव ठाकरेंचे वकील, अॅडव्होकेट असीम सरोदे यांनी प्रतिक्रिया दिली आहे की, धनुष्यबाण चिन्ह उद्धव ठाकरेंना परत मिळणे अपेक्षित आहे किंवा ते गोठवले तरी चालेल. जर हे चिन्ह तात्पुरते गोठवले गेले, तर शिंदे गटाला महापालिका निवडणुकांपूर्वी मोठा धक्का बसण्याची शक्यता आहे. या निकालाकडे केवळ महाराष्ट्राचेच नव्हे, तर संपूर्ण देशाचे लक्ष लागले आहे.