Mumai Rain Update | पावसामुळे विधानसभेचे कामकाज ठप्प! मंत्रीच पोहोचले नाहीत, सभा तहकूब

मुंबईतील मुसळधार पावसाचा फटका आता राज्याच्या विधिमंडळाच्या कामकाजालाही बसल्याचे चित्र समोर आले आहे. पावसामुळे शहरातील वाहतूक विस्कळीत झाल्याने अनेक मंत्री वेळेत विधानसभेत पोहोचू शकले नाहीत. त्यामुळे सभागृहाचे कामकाज काही काळासाठी प्रभावित झाले.

सकाळी 9.30 वाजता विशेष सत्राला सुरुवात होणार होती. मात्र, लक्षवेधी सूचनेवरील उत्तर देण्यासाठी संबंधित मंत्री सभागृहात अनुपस्थित असल्याने विधानसभा अध्यक्षांनी कामकाज 10 मिनिटांसाठी तहकूब करण्याची घोषणा केली.

मुंबईत सकाळपासून सुरू असलेल्या रिमझिम ते मुसळधार पावसामुळे अनेक ठिकाणी वाहतूक कोंडी झाली असून, त्याचाच परिणाम विधिमंडळाच्या कामकाजावर झाल्याची माहिती समोर आली आहे. वाहतूक कोंडीत अडकल्यामुळे संबंधित मंत्री वेळेत विधानभवनात पोहोचू शकले नसल्याचे सांगण्यात आले.

दरम्यान, पावसामुळे मुंबईतील जनजीवन विस्कळीत झाले असून, रस्त्यांवरील वाहतूक संथ गतीने सुरू आहे. त्याचा परिणाम केवळ नागरिकांवरच नव्हे, तर राज्याच्या प्रशासकीय आणि विधिमंडळाच्या कामकाजावरही झाल्याचे या घटनेतून स्पष्ट झाले आहे.