कांद्याच्या भावात घसरण; नाशिकमध्ये शिवसेना आक्रमक!

नाशिकमध्ये कांद्याचे सरासरी बाजारभाव 1 हजार रुपयांच्या खाली आल्याने कांदा उत्पादक शेतकरी मोठ्या आर्थिक संकटात सापडले आहेत. विशेषतः कांद्याची प्रमुख बाजारपेठ म्हणून ओळख असलेल्या लासलगाव कृषी उत्पन्न बाजार समितीमध्ये ही घसरण तीव्रतेने जाणवत आहे. या परिस्थितीच्या निषेधार्थ शिवसेना (शिंदे गट), शिवसेना (ठाकरे गट) आणि छावा क्रांतीवीर सेनेच्या पदाधिकाऱ्यांनी आक्रमक भूमिका घेतली आहे.

या संघटनांच्या पदाधिकाऱ्यांनी लासलगाव येथील पाण्याच्या टाकीवर चढून शोले चित्रपटातील दृश्याप्रमाणे अनोखे आंदोलन केले आहे. त्यांच्या गळ्यात कांद्याच्या माळा घालून त्यांनी केंद्र व राज्य सरकारचे लक्ष वेधण्याचा प्रयत्न केला. कांद्याला किमान 2 हजार रुपये हमीभाव मिळावा, 1500 रुपये प्रति क्विंटल अनुदान मिळावे आणि कांद्यासाठी समांतर बाजारभाव योजना लागू करावी, अशा त्यांच्या प्रमुख मागण्या आहेत. या आंदोलनाद्वारे शेतकरी हिताचे निर्णय घेण्यास सरकारला प्रवृत्त करण्याचा त्यांचा उद्देश आहे.