Navi Mumbai Water Crisis : पालिकेत पाणी कपातीवरून भाजप-शिवसेनेत जोरदार खडाजंगी

नवी मुंबईत पाणी प्रश्नावरून राजकीय वातावरण तापले आहे. नवी मुंबई महापालिकेत (NMMC) आयोजित विशेष सभेत पाणी कपातीवरून सत्ताधारी भाजप आणि विरोधी शिवसेना यांच्यात जोरदार संघर्ष पाहायला मिळाला. महापालिकेने नवी मुंबईकरांना पिण्याच्या पाण्यात कोणतीही कपात न करण्याचे आश्वासन दिले आहे.

महापालिकेच्या म्हणण्यानुसार, नवी मुंबईकडे सध्या पुरेसा पाणीसाठा उपलब्ध आहे. त्यामुळे पिण्याच्या पाण्याची कपात करण्याची आवश्यकता नाही. मात्र, पाणी बचत करण्याच्या दृष्टीने इतर बिगर-आवश्यक वापरांवर लक्ष केंद्रित करण्यात येणार आहे. यामध्ये बागांसाठी वापरले जाणारे पाणी, सर्विस सेंटरमधील वापर, बांधकाम क्षेत्रातील वापर, तसेच अनधिकृत पाणी कनेक्शन आणि गळती यांवर नियंत्रण आणून पाण्याची बचत करण्याचे नियोजन आहे.

या निर्णयासंदर्भात विरोधकांनी प्रश्नचिन्ह उपस्थित केले आहे. पाणी हे राष्ट्रीय संपत्ती असून, पुढील पिढ्यांसाठी आणि भविष्यातील पाण्याच्या गरजा लक्षात घेऊन व्यापक उपाययोजना करण्याची मागणी काही सदस्यांनी केली. एल निनोच्या प्रभावामुळे भविष्यात पाणीटंचाईची शक्यता असताना, केवळ नवी मुंबईकरांना पाणी देण्याच्या भूमिकेवर टीका करण्यात आली.