Dhananjay Munde Meets Shah : धनंजय मुंडे यांची दिल्ली वारी, शहांची भेट, कोकाटेंच्या प्रकरणानंतर मुंडेंना पुन्हा संधी?

धनंजय मुंडे यांनी आज दिल्लीत केंद्रीय गृहमंत्री अमित शहा यांची अचानक भेट घेतली. साधारण एक तास चाललेल्या या भेटीने महाराष्ट्राच्या राजकारणात अनेकांच्या भुवया उंचावल्या आहेत. सध्या माणिकराव कोकाटे यांच्यावर अटकेची तलवार असून, त्यांचे मंत्रिपद धोक्यात असल्याचे बोलले जात आहे. या पार्श्वभूमीवर मुंडे आणि शहा यांच्यातील भेटीला विशेष महत्त्व प्राप्त झाले आहे. कोकाटेंचे मंत्रिपद गेल्यास धनंजय मुंडे यांना पुन्हा मंत्री होण्याची संधी मिळेल का, अशी चर्चा राजकीय वर्तुळात सुरू आहे. मुंडे यांनी माध्यमांशी संवाद साधणे टाळले असून, भेटीचे नेमके कारण अजून गुलदस्तात आहे. यापूर्वी राजीनामा दिल्यानंतर मुंडे यांनी अमित शहांना भेटण्याचा प्रयत्न केला होता, मात्र त्यावेळी ते शक्य झाले नव्हते. त्यामुळे ही भेट आणि तिचे संभाव्य परिणाम महाराष्ट्राच्या राजकारणासाठी महत्त्वाचे ठरतील.