NEET घोटाळ्याविरोधात रस्त्यावर उतरली युवा काँग्रेस; मुंबईत सरकारविरोधात जोरदार घोषणाबाजी!

देशभर गाजत असलेल्या नीट (NEET) पेपरफुटी प्रकरणावरून राजकीय वातावरण तापले असून, या प्रकरणाच्या निषेधार्थ युवक काँग्रेसने मुंबईत जोरदार आंदोलन छेडले. महाराष्ट्राचा या कथित पेपरफुटी प्रकरणाशी संबंध जोडला जात असल्याने राज्यातही या मुद्द्यावरून संतप्त प्रतिक्रिया उमटत आहेत.

मुंबईतील दादर परिसरात आज युवक काँग्रेसच्या कार्यकर्त्यांनी मोठ्या संख्येने एकत्र येत केंद्र आणि राज्य सरकारविरोधात जोरदार घोषणाबाजी केली. आंदोलनादरम्यान पेपरफुटी प्रकरणाची सखोल चौकशी करावी आणि दोषींवर कठोर कारवाई करावी, अशी मागणी आंदोलनकर्त्यांनी केली.

या आंदोलनात युवक काँग्रेसचे अनेक पदाधिकारी आणि नेते सहभागी झाले होते. आंदोलन अधिक आक्रमक होत असल्याचे लक्षात आल्यानंतर पोलिसांनी परिस्थिती नियंत्रणात ठेवण्यासाठी कडक बंदोबस्त तैनात केला होता. दादर परिसरात ठिकठिकाणी बॅरिकेड्स लावण्यात आले होते तसेच कायदा व सुव्यवस्था अबाधित राखण्यासाठी अतिरिक्त पोलीस फौजही तैनात करण्यात आली होती.

दरम्यान, आंदोलनादरम्यान काही कार्यकर्त्यांनी आक्रमक भूमिका घेतल्यानंतर पोलिसांनी त्यांना ताब्यात घेतल्याची माहिती समोर आली आहे. नीट पेपरफुटी प्रकरणावरून देशभरात संताप व्यक्त होत असताना, मुंबईतील या आंदोलनामुळे हा मुद्दा पुन्हा एकदा चर्चेच्या केंद्रस्थानी आला आहे.