विधानसभा अध्यक्ष म्हणून राहुल नार्वेकरांना पुन्हा संधी मिळणार की पत्ता कट होणार?

विधानसभा अध्यक्षपदासाठी येत्या ८ डिसेंबर रोजी उमेदवारी अर्ज भरण्यात येणार असल्याची माहिती समोर येत आहे. भारतीय जनता पक्षाकडून येत्या ८ डिसेंबर रोजी दुपारी १२ वाजेपर्यंत अर्ज भऱण्यात येणार आहे. तर अर्ज भरण्याच्या प्रक्रियेनंतर दुसऱ्या दिवशी म्हणजेच येत्या ९ डिसेंबर रोजी विधानसभा अध्यक्षांची निवड करण्यात येणार आहे. दरम्यान, विधानसभा अध्यक्षपदासाठी राहुल नार्वेकर यांना पुन्हा संधी मिळणार का? की भाजप नवनिर्वाचित आमदाराला संधी देणार? हे पाहणं तितकंच महत्त्वाचं असणार आहे. दरम्यान, आज महाराष्ट्र विधानसभेचे हंगामी अध्यक्ष म्हणून भाजपचे ज्येष्ठ आमदार कालिदास कोळंबकर यांची नियुक्ती करण्यात आली आहे. आज राजभवनात कालिदास कोळंबकर यांनी हंगामी अध्यक्ष म्हणून शपथ घेतली. राज्यपाल सी.पी. राधाकृष्णन यांनी कालिदास कोळंबकर यांना पद आणि गोपनीयतेची शपथ दिली. यामुळे आता राहुल नार्वेकर यांचा पत्ता कट झाल्याची चर्चा रंगली आहे. उद्यापासून तीन दिवसीय मुंबईत विशेष अधिवेशन होणार आहे. या विधीमंडळाच्या विशेष अधिवेशनामध्ये नवनिर्वाचित आमदारांना पद आणि गोपनीयतेची शपथ देण्यात येते. ही शपथ देण्यासाठी हंगामी अध्यक्षांची निवड करणं गरजेचे असते. त्यानुसार कालिदास कोळंबकर यांची विधानसभेच्या हंगामी अध्यक्षपदी नियुक्ती करण्यात आली आहे.