Raigad Heavy Rain | रायगडमध्ये पावसाचे रौद्ररुप; पर्यायी रस्ता वाहून गेल्याने संपर्क तुटला

रायगड जिल्ह्यातील अलिबाग तालुक्याला मुसळधार पावसाचा जोरदार फटका बसला असून अनेक भागांमध्ये पूरसदृश परिस्थिती निर्माण झाली आहे. विशेषतः देहीन गावात पावसामुळे नागरिकांचे जनजीवन विस्कळीत झाले असून गावातील संपर्क व्यवस्थेवर मोठा परिणाम झाला आहे.

देहीन गावाजवळ सुरू असलेल्या पुलाच्या अर्धवट कामामुळे नागरिकांसाठी तयार करण्यात आलेला पर्यायी रस्ताही पावसाच्या पाण्याच्या प्रवाहात वाहून गेला आहे. त्यामुळे गावाचा संपर्क तुटण्याची वेळ आली असून स्थानिक नागरिकांना मोठ्या अडचणींचा सामना करावा लागत आहे.

विशेष म्हणजे, या समस्येकडे यापूर्वीही लक्ष वेधण्यात आले होते. पूल बांधकामातील विलंब आणि पर्यायी रस्त्याच्या निकृष्ट अवस्थेबाबत अनेकदा तक्रारी करण्यात आल्या होत्या. या संदर्भात माध्यमांनीही वारंवार वृत्तांकन केले होते. मात्र, अद्याप रायगड जिल्हा प्रशासनाकडून कोणताही ठोस आणि कायमस्वरूपी उपाय करण्यात आलेला नसल्याचा आरोप स्थानिकांकडून केला जात आहे.

दरम्यान, मुसळधार पावसाचा जोर कायम असल्याने परिस्थिती आणखी गंभीर होण्याची शक्यता व्यक्त केली जात आहे. नागरिकांनी प्रशासनाकडे तातडीने उपाययोजना करण्याची मागणी केली असून, गावातील वाहतूक आणि दैनंदिन जीवन पूर्ववत करण्यासाठी युद्धपातळीवर काम सुरू करण्याची आवश्यकता व्यक्त केली जात आहे.