Maharashtra Election 2026 : निवडणूक आयोग झोपलाय की विकला गेलाय? आचारसंहिता भंगावरून राऊतांचा घणाघात

भाजप प्रदेशाध्यक्ष रवींद्र चव्हाण यांनी मतदान केंद्रात शर्टवर कमळाचे चिन्ह लावून मतदानाला हजेरी लावल्याने राजकीय वर्तुळात नवा वाद निर्माण झाला आहे. या घटनेवरून शिवसेना (उद्धव बाळासाहेब ठाकरे) नेते संजय राऊत यांनी तीव्र आक्षेप नोंदवला असून, निवडणूक आयोगाच्या भूमिकेवर प्रश्नचिन्ह उपस्थित केले आहे. राऊत यांनी ट्वीट करत निवडणूक आयोगावर सडकून टीका केली. निवडणूक आयोग झोपलाय की विकला गेलाय? असा थेट सवाल त्यांनी उपस्थित केला.

रवींद्र चव्हाण यांनी छातीवर कमळाचे चिन्ह लावून मतदानास जाणे हा आचारसंहितेचा स्पष्ट भंग असल्याचे राऊत यांनी म्हटले आहे. या प्रकारावर निवडणूक आयोग काय कारवाई करणार, असा प्रश्नही त्यांनी विचारला. महाराष्ट्रातील स्थानिक स्वराज्य संस्थांच्या निवडणुका आणि राजकीय घडामोडींच्या पार्श्वभूमीवर ही घटना घडली आहे. आचारसंहितेच्या अंमलबजावणीबाबत निवडणूक आयोगाच्या सचोटीवर प्रश्नचिन्ह उपस्थित करणारी ही बाब आहे. राऊत यांनी मुख्यमंत्र्यांच्या ठेचून काढण्याच्या भाषेचाही उल्लेख करत या घटनेवर कारवाईची मागणी केली आहे. या प्रकरणामुळे महाराष्ट्राच्या राजकारणात आचारसंहिता आणि निवडणूक आयोगाच्या भूमिकेवर पुन्हा एकदा चर्चा सुरू झाली आहे.