पुणे विद्यापीठ चौकातील उड्डाणपुलाचे मुख्यमंत्री फडणवीसांच्या हस्ते उद्घाटन

पुणे विद्यापीठ चौकातील उड्डाणपुलाचे आज मुख्यमंत्री देवेंद्र फडणवीस यांच्या हस्ते ऑनलाइन पद्धतीने उद्घाटन पार पडले. गेल्या साडेचार वर्षांपासून या उड्डाणपुलाचे काम सुरू होते. कोरोना काळापासून सुरू असलेल्या या कामामुळे परिसरातील वाहतूक कोंडीचा पुणेकरांना मोठ्या प्रमाणात सामना करावा लागत होता. मात्र, आता हा उड्डाणपूल वाहतुकीसाठी पूर्णपणे खुला करण्यात आला आहे.

या उद्घाटन सोहळ्याला प्रत्यक्षात उपमुख्यमंत्री एकनाथ शिंदे, उपमुख्यमंत्री सुनेत्रा पवार, केंद्रीय राज्यमंत्री मुरलीधर मोहोळ, राज्यमंत्री माधुरी मिसाळ आणि महापौर मंजुषा नागपुरे यांची प्रमुख उपस्थिती होती. हा विद्यापीठ चौक पुणे शहरातील एक महत्त्वाचा आणि वर्दळीचा चौक असल्याने, या उड्डाणपुलामुळे येथील वाहतूक कोंडीचा मोठा प्रश्न कायमस्वरूपी मिटण्यास मदत होणार आहे. मेट्रोच्या कामामुळे जुना उड्डाणपूल पाडण्यात आल्यानंतर हा नवीन उड्डाणपूल उभारण्यात आला आहे. काही महिन्यांपूर्वी एक बाजू सुरू करण्यात आली होती, आता दुसरी बाजू देखील खुली झाली आहे.