ठाकरे गटाची बाजू… शिवसेना सुनावणी आधीच मोठा धमाका? बड्या वकिलाचं विधान चर्चेत

आज सुप्रीम कोर्टात शिवसेना पक्ष आणि चिन्हाबाबत अत्यंत महत्त्वाची सुनावणी होणार आहे. या सुनावणीसाठी मुख्यमंत्री एकनाथ शिंदे दिल्लीमध्ये दाखल झाले आहेत. आज कोर्टात शिंदेंच्या बाजूनं प्रभावी युक्तिवाद केला जाणार आहे, अशी माहिती समोर आली आहे.

या सुनावणीच्या पार्श्वभूमीवर कायदेतज्ज्ञ आसिम सरोदे यांनी आपले मत व्यक्त केले आहे. उद्धव ठाकरे यांच्या वकिलांनी सादर केलेले मुद्दे हे अत्यंत निर्विवाद स्वरूपाचे आणि संविधानिक सत्य असलेले आहेत, असे सरोदे यांनी म्हटले आहे. या संविधानिक सत्यावर आधारित मुद्द्यांना शिंदेंच्या बाजूने कसे खोडून काढले जाते, याबाबत मला आणि अनेक लोकांना उत्सुकता लागून राहिली आहे, असे आसिम सरोदे यांनी सांगितले. सरोदे यांच्या मते, जेव्हा पक्ष फुटला, त्यावेळी परिस्थिती काय होती, याचा निवडणूक आयोगाने विचार करायला पाहिजे होता. हीच बाब कोर्टात मांडण्यात आली आहे आणि यासंदर्भातले निर्णय आम्ही तिथे सादर केलेले आहेत, असेही सरोदे यांनी स्पष्ट केले. त्यामुळे आजच्या सुप्रीम कोर्टातील सुनावणीकडे संपूर्ण महाराष्ट्राचे लक्ष लागून राहिले आहे.