Thackeray Brothers : 21 वर्षांनी राज-उद्धव ठाकरेंची एकत्र भाऊबीज, लाडक्या बहिणीची पहिली प्रतिक्रिया काय? राजकीय चर्चांना उधाण

तब्बल 21 वर्षांच्या प्रतीक्षेनंतर मनसे अध्यक्ष राज ठाकरे आणि शिवसेना (उद्धव बाळासाहेब ठाकरे) पक्षप्रमुख उद्धव ठाकरे यांनी एकत्रितपणे भाऊबीज साजरी केली. ही भाऊबीज त्यांची बहीण जयजयवंती ठाकरे-देशपांडे यांच्या घरी साजरी करण्यात आली. यावेळी जयजयवंती यांनी दोन्ही भावांचे औक्षण केले. जयजयवंती ठाकरे-देशपांडे यांनी या भेटीला खरी दिवाळी असे संबोधले. या कौटुंबिक सोहळ्यात आदित्य ठाकरे, अमित ठाकरे, तेजस ठाकरे आणि यश देशपांडे या तरुण पिढीतील सदस्यांचे औक्षण उर्वशी ठाकरे यांनी केले. या ऐतिहासिक भेटीवर राजकीय वर्तुळातून प्रतिक्रिया उमटल्या आहेत.

भाजप आमदार चित्रा वाघ यांनी ठाकरे बंधूंना टोला लगावला, की ही भेट लोकांना दाखवण्यासाठी किंवा राजकारणासाठी असली तरी, बहिणींसाठी ही आनंदाची बाब आहे. वाघ यांनी आगामी महानगरपालिका निवडणुकीत भ्रष्टाचाराविरोधात भावांचे राज्य येईल, असे भाकीत केले. या कौटुंबिक भेटींमुळे भविष्यातील राजकीय युतीची शक्यता वर्तवली जात आहे.