Tiger Shroff Case : टायगर श्रॉफ प्रकरणात मोठी अपडेट समोर; बाईक अंधेरीत पार्क, ट्रेनने पळाले अन्…..

अभिनेता टायगर श्रॉफवरील गोळीबार प्रकरणी एक महत्त्वपूर्ण अपडेट समोर आले आहे. या घटनेनंतर पळणाऱ्या आरोपींचे सीसीटीव्ही फुटेज पोलिसांनी मिळवले आहे. या फुटेजमध्ये आरोपी अंधेरी स्थानकाजवळ आपली बाईक पार्क करून ट्रेनने पळ काढताना दिसत आहेत. गर्दीत मिसळून मुंबईबाहेर जाण्याच्या तयारीत असलेले हे आरोपी सीसीटीव्ही कॅमेऱ्यात कैद झाले होते, ज्यामुळे त्यांची ओळख पटवण्यात पोलिसांना यश आले.

या सीसीटीव्हीच्या आधारे पोलिसांनी आरोपींचा पाठलाग केला. मिळालेल्या माहितीनुसार, हे आरोपी मुंबईहून राजस्थानमधील कोटा येथे पोहोचले होते. तिथे मुंबई पोलिसांकडून मिळालेल्या इनपुटच्या आधारे राजस्थान पोलिसांनी तातडीने कारवाई करत तिन्ही आरोपींना (दोन शूटर्स आणि त्यांचा एक सहकारी) अटक केली. अटक केलेल्या आरोपींचा दिल्लीमार्गे नेपाळला पळण्याचा कट होता.

या हल्ल्यातून अभिनेता टायगर श्रॉफ सुदैवाने बचावला आहे, मात्र त्याच्या चालकाला गोळीबारात दुखापत झाली आहे. लवकरच या आरोपींना मुंबईत आणून न्यायालयात हजर केले जाईल.